ആൾകൂട്ടം

നിങ്ങളുടെ ഉദ്ദേശ്യം ഞങ്ങൾക്ക് മനസ്സിലായി.
ഞങ്ങളുടെ ഫ്ലക്സ് വലിച്ചു കീറാൻ നിങ്ങൾക്കെന്താ ഇത്ര തിരക്ക്.......
ഒരു കാര്യം പറഞ്ഞേക്കാം കളി ഞങ്ങളോട് വേണ്ട .....
ഇവിടെ മാത്രമെന്താ ഒരു പ്ലാസ്റ്റിക് നിരോധനം.....
മറ്റെവിടെയും ഇല്ലല്ലോ ഇത്.....
മറ്റവന്റെ ഫ്ലക്സ് ഒരു മാസമായി അവിടെ തൂങ്ങുന്നു. അതിന് ആർക്കും ഒരു കുഴപ്പവും ഇല്ല.......
കൊറേ കാലമായി ഞങ്ങൾ ഇത് സഹിക്കുന്നു......
ഇവന് അവരുടെ കൈയ്യീന്ന് കെട്ട് കണക്കിന് കിട്ടുന്നുണ്ട്. .......
മഴ ഇനിയും പെയ്യും......

ആൾകൂട്ടം ആക്രോശിക്കുകയാണ്.മോബ് സൈക്കോളജി മനസ്സിലാക്കിയ ഉദ്യോഗസ്ഥൻ തല കുനിച്ചിരിക്കുകയാണ്. ഒന്നും അങ്ങോട്ട് പറഞ്ഞിട്ട് കാര്യമില്ല. നിയമമാണെന്നും നിയമം പാലിക്കപെടാനുള്ളതാണെന്നും, പരിസ്ഥിതി സംരക്ഷിക്കണമെന്നും സഹകരിക്കണമെന്നും ഒക്കെ പറഞ്ഞിട്ട് കാര്യമില്ല. ഒറ്റയടിക്ക് മറുപടി കിട്ടും. അതുചിലപ്പോൾ തെറിയായിരിക്കും, കൈയ്യാങ്കളിയല്ലെങ്കിൽ ഭാഗ്യം. ഏറിയ പങ്കും ഉദ്യോഗസ്ഥർ നിഷ്പക്ഷമായിത്തന്നെ കാര്യങ്ങൾ കൈകാര്യം ചെയ്യും. എന്നാലും ഇത്തരം പ്രതിസന്ധികൾ സർവ്വസാധാരണം.

ഈ ആൾകൂട്ടം ഏത് സംഘടനയെയോ പ്രസ്ഥാനത്തെയോ പ്രതിനിധികരിക്കുന്നതായാലും സ്ഥിതിഗതികൾ ഏതാണ്ട് ഇതൊക്കെത്തന്നെയാണ്.