Tuesday, April 12, 2016

അവൻ ഞങ്ങളുടെ ആദ്യ ഹീറോ........ ഒരു കൂസലുമില്ലാതെ ക്യാപ് (പൊട്ടാഷ്) ഇടിച്ചു പൊട്ടിക്കും.കാണാനാളുണ്ടെങ്കിൽ അനുയോജ്യമായ സ്ഥലത്ത് കുനിഞ്ഞിരുന്ന് ക്യാപ് പൊട്ടിക്കും.സ്കൂളിലേയ്ക്കുള്ള വഴിയോരങ്ങളിൽ നിന്ന് ഉടമസ്ഥനറിയാതെ മോഷ്ടിക്കുന്ന കശുവണ്ടി കടയിൽകൊടുത്താൽ കിട്ടുന്ന തുട്ടുകളാണ് അവൻറെ പോക്കറ്റ് മണി.ഞങ്ങളുടെ ആവശ്യാനുസരണം അവൻ പൊട്ടിച്ചു കാണിച്ചു തരും.പെൺ കുട്ടികൾ കൂട്ടം കൂടി നോക്കി നിൽക്കുമ്പോൾ പൊട്ടിക്കുമ്പോൾ അവൻറെ മുഖത്ത് പ്രത്യേക ഭാവമായിരുന്നു. കാഴ്ചക്കാരെ വിസ്മയിപ്പിച്ചു കൊണ്ടുള്ള പ്രകടനത്തിനുശേഷം കല്ല് അലക്ഷ്യമായി വലിച്ചെറിഞ്ഞ് ശേഷിച്ച ക്യാപുകൾ അടച്ച് കീശയിൽ തിരുകി ആരെയും നോക്കാതെ നടന്നു നീങ്ങുമ്പോൾ അവന് സിനിമയിലെ നായകൻറെ പരിവേഷമായിരുന്നു.നാലാം ക്ലാസ്സിൽ പഠിപ്പ് നിർത്തിയ അവനെ ഞങ്ങൾക്ക് പിന്നെ ഓർക്കേണ്ടി വന്നിട്ടില്ല.കാരണം കാലം പോകുന്നതനുസരിച്ച് നായക പദവികളലങ്കരിക്കുന്നവരും മാറിമാറി വന്നു കൊണ്ടേയിരുന്നു.

Saturday, April 9, 2016

ഇനിയുമെന്തിനു കൺഫ്യൂഷൻ !!! കാരുണ്യ ലോട്ടറിയുമായി കരുണയാചിച്ചു വരുന്ന കരുണൻറെ കൈയ്യിലെ ലോട്ടറി ഡ്യൂപ്ലിക്കേറ്റാണുപോലും!!! പിച്ച തെണ്ടി നടക്കുന്ന കൊച്ച് അമ്മയുടെ എളിയിലെ കുഞ്ഞിന് കൊച്ചിയിൽ കാണാതായ കൊച്ചിൻ്റെ ഛായയുണ്ടത്രെ !!! വട്ടുപിടിച്ചലഞ്ഞു നടക്കുന്ന അട്ടപ്പാടിയിലെ കൊട്ടൻ , തന്നെ പോലീസിനു വിട്ടുകൊടുക്കാത്ത കട്ടു പറിച്ചു നടന്ന കാട്ടുകള്ളനത്രെ !!! പരിസ്ഥിതി കാക്കാനായി പരക്കെ പരാതിയുമായി നടക്കുന്ന പരശിവൻ പൂഴി വിറ്റ് കാശുണ്ടാക്കി നിരോധിത മേഖലയിൽ ഫൈവ് സ്റ്റാർ തട്ടുകട തുടങ്ങിയത്രെ !!! വണ്ടിയിൽ താണുവീണ് കേണ് യാചിക്കുന്ന വേണുഗോപാലൻ യാചക ഗണപരിഷത്തിൻറെ പ്രമുഖ ഭാരവാഹിയത്രെ !!! വിവരാവകാശ പ്രവർത്തകനായി വിവരങ്ങൾ ശേഖരിച്ച് പണം പേശുന്ന വിവരമുള്ള വനത്രെ നമ്മുടെ മുരുകേശൻ !!! നാട്ടിലെ പ്രമാണിയും പരോപകാരിയും സർവ്വത്ര ജന സമ്മതനുമായ ഇന്ദീവരത്തിലെ കുന്ദൻ മുതലാളി പഴയ ചന്ദന കടത്തുകാരനത്രെ !!! നേരു നേരത്തെ അറിയിക്കാൻ നേരിട്ട് കാശ് വാങ്ങി എല്ലാം നേരെയാക്കുന്ന പത്രമാണു പോലും ''നേർവഴി'' ദിന പത്രം !!! നാട്ടിലെ പ്രമുഖ സദാചാര പോലീസ് സദാശിവൻ ജോലിയും കൂലിയുമില്ലാതെ തേരാപാര നടന്ന് മടുത്തതിനാലാണത്രെ ഈ ജോലിയിൽ കയറിയത് !!! മുഖത്തെ പുഞ്ചിരിയും ദേഹത്തിലെ കറപുരളാത്ത വസ്ത്രവും അകത്തെ കലിപ്പിനു മറയത്രെ !!! ഇനിയുമെന്തിനു കൺഫ്യൂഷൻ !!!

Wednesday, April 6, 2016

പത്തു രൂപയാണ് അവൾ ആവശ്യപെട്ടത് . പത്തിന് രണ്ട് ഞാനാവശ്യപെട്ടു. നഹീം ഭൈയ്യാ ......... തിരിച്ചു വന്നപ്പോൾ പൂക്കളൊക്കെ അതേ പടി കൈയ്യിലിരിക്കുന്നു. ദസ് റുപയാ ദൊ.....ഞാൻ വീണ്ടും ചോദിച്ചു ഠീക് ഹൈ ഭയ്യാ.....ലൊ. എൻ്റെ കഴിവിൽ എനിക്ക് അഭിമാനം തോന്നി.പത്ത് രുപയ്ക്ക് രണ്ട് പൂക്കൾ...നല്ല ലാഭം. അടുത്ത ദിവസം അതുവഴിപോയപ്പോൾ അവൾ വയറ്റത്ത് അടിച്ച് യാചിക്കുകയാണ്. ചായ് കാ പൈസാ ദെ ദൊ ഭയ്യാ........ ഇതിനൊക്കെ മാന്യമായ എന്തെങ്കിലും തൊഴിലു ചെയ്ത് ജീവിച്ചു കൂടെ എന്ന് ആരോ പറയുന്നതുകേട്ട് ഞാൻ എൻറെ നടത്തം അൽപം കൂടി സ്പീഡിലാക്കി.........

Tuesday, April 5, 2016

കളിയേതുമില്ല ചിരിയുമൊട്ടില്ല
കുസൃതികാട്ടുവാൻ വഴിയേതുമില്ല
മുതുകിലെഭാരം ഗുണനിലവാരം
പ്രഥമനായിടാൻബഹുവിധ വേഷം
മുലപാലുമില്ലകിളികൊഞ്ചലില്ല
കൊതിയൂറുന്നോരു ലഹരി മിഠായികൾ
മനോമോഹമാം പൊതിക്കുള്ളിലാക്കി
കൊടുത്തിടുമ്പോഴും നമുക്കില്ല ചേതം
ഉടയവരില്ലാ അനാഥമാം ബാല്യം
പുതിയ പിതാവിൻറെകലുഷിതമനം
അവരുടെ വകകൊടിയപീഡനം
കരയുവാൻപോലുംവഴിയേതുമില്ല
ഭയാതുര മുഖംവ്രണിതമാം ദേഹം
ഒരു തലോടിനു കൊതിക്കുമാപൈതൽ
മനസ്സറിയുവോർസഹിച്ചിരിക്കുമോ
കലാപകാലത്തിൽപലായനംചെയ്യും
പരവശരായ ഹതഭാഗ്യർതൻ
വിറയാർന്ന കൈയ്യിൽകുസൃതികാട്ടിടും
അരുമകളവർവഴുതിവീഴുന്നു
ദുരമൂത്ത ലാഭകൊതിയർ തന്നുടെ
വിഷമഴയുടെഫലസ്വരൂപമായ്
നരകയാതനഅനുഭവിച്ചിടുംബാല്യം
നുറുങ്ങുമസ്ഥികൾ വളർച്ചയില്ലാത്തവർ
തളർച്ച ബാധിച്ചവർ മിതബുദ്ധികളും
മൃതപ്രായരാകും ബഹുവിധമവർ
ദുരിത മിതുകാട്ടി പണം പിടുങ്ങുവോർ
കൊടിയകാപാലികർ അനേകമായിരം
ഭയാനക യുദ്ധംവിതയ്ക്കുന്നു നാശം
പൊടിപുരമായ അവശിഷ്ടങ്ങളും
അവയ്ക്കിടയിലെ ശവശരീരവും
ദിഗന്ദങ്ങൾപൊട്ടുംവിജയഭേരിയിൽ
ഉടയവരില്ലാ ചെറുപൈതൽതൻറെ
കരളലിയിക്കുംകരച്ചിലാർകേൾക്കും
ദേവതുല്യരത്രെ ഭാവിവാഗ്ദാനമത്രെ
കളങ്കമൊട്ടില്ല ലവലേശംപോലും
പ്രതികരിക്കാനും തിരിച്ചടിക്കാനും
കഴിവില്ലാത്തവർ അരുമയാം മക്കൾ
ദുരാചാരങ്ങൾക്ക് വിധേയരായവർ
കൊടിയപാതകം അനുഭവിക്കുന്നു
ദിനംപ്രതിയിതുപെരുകുന്നു വേഗം
ശിശുക്ഷേമകാര്യംനിയമത്തിൽ മാത്രം
പിറക്കാത്തഭ്രൂണം കൊടുക്കാത്തവിദ്യ
ലിംഗനീതികൾ ഹനിക്കപ്പെടുന്നു
ഇരുട്ടിലെ കോണിൽപരക്കുന്നഭീതി
അറയ്ക്കുന്ന ചെയ്തി
 വിറയ്ക്കുന്ന കാമംപിടയ്ക്കുന്ന ദേഹം
കുനിയുന്ന സ്വത്വംമനുഷ്യരോ നമ്മൾ
മൃഗങ്ങൾക്കുപോലുംതിരിവുണ്ടിതേറെ
വരപ്രസാദംപോൽലഭിച്ചീടും മക്കൾ
അഭിശപ്തരായി വളരുന്നതെന്ത്
വരുത്തേണ്ടതെല്ലാം വരുത്തീടും കാലം
കൊടുക്കില്ല മാപ്പ്നിനയ്ക്കേണം നന്നായ്
യാത്രകൾ

എത്രയോ യാത്രകൾ കാരണീഭൂതമായ്
പൈതൃക ഭൂമിയീ തൽപം വരിക്കുവാൻ

പടിപടിയായോരോ പടികളെ താണ്ടി
ഒരു നല്ല സംസ്കാര ഗേഹമായ് മാറിടാൻ

അതിജീവനത്തിനായ്  എരിവയറായി  
ഇരതേടി ഓടി നടന്നോരു യാത്രകൾ

വരളുന്ന തൊണ്ടയിൽ നനവായിറക്കുവാൻ
ഒരു തുള്ളി ജല മൊന്നു തേടിപ്പിടിക്കുവാൻ

അന്നത്തെ ദഹനത്തിനായി യൊരുക്കുവാൻ
ഇന്ധനം ശേഖരിക്കാനുള്ള യാത്രകൾ

അദ്ഭുത കാഴ്ചകൾ തിങ്ങി നിറഞ്ഞൊരീ
  പ്രകൃതിതൻ  കൗതുക കാഴചയ്കുയാത്രകൾ

തുണയായി വേണമൊരിണയെന്നു കരുതി
മനതാരിലതിയായ മോഹവുമായി

സഹജീവനത്തിനു തടയായിടുന്നോര രികളെ
ഉന്മൂലം ചെയ്യുവാൻ യാത്രകൾ

കാതങ്ങളകലെയാം ഭൗമോപ ഖണ്ഡത്തിൽ
  ജീവജലത്തെ തേടുന്ന യാത്രകൾ

ദുരമൂത്ത ജാതികൾ ആസ്തിതൻ വ്യാപന
  ഹേതുവായ് മേധങ്ങളായി നടത്തിയ    യാത്രകൾ

 പരതന്ത്ര ബന്ധന മോചനത്തിന്നായി
ആദർശ ധീരമാം മോചന  യാത്രകൾ

അദ്വൈത ചിന്തയിൽ
വൃത ശുദ്ധിയോടൊത്ത്
 തൃപടി ശരണാർത്ഥമായുള്ള യാത്രകൾ

കർമ ഫലത്തിനാലെല്ലാം നശിച്ചു
ലക്ഷ്യ മില്ലാത്തോരു നിഷ്ഫലയാത്രകൾ

ജ്ഞാന പ്രകാശനായ് ലോകത്തെ ദർശിച്ച്
ചിത്തത്തിൽ സത്യത്തിൻ പൊരുളിനായ് യാത്രകൾ

കർമ്മപഥത്തിൽ മൗഢ്യഭാവം മാറി   ഊർജ്ജ സ്വലതയ്ക്കുല്ലാസയാത്രകൾ

ആദർശ,മോചന,പ്രചരണ യാത്രകൾ
കാൽ നട  വിശ്വാസ വഞ്ചന യാത്രകൾ

വാഹനയാത്രകൾ മതേതര യാത്രകൾ
രക്ഷായാത്രകൾ കേരള യാത്രകൾ
 സേതു ഹിമാലയ അഗണിത യാത്രകൾ

യാത്രകൾ നിഷ്കാമ പൂരിതമാകണം
ഔന്നത്യ ചിന്താ സുരഭിലമാകണം
നല്ല സമുഹത്തിൻ കാരകമാകണം
സംസ്കൃതി തേജോമയമായി മാറണം
സത്യം വെളിവാകുമാറായീടണം
പതിതനു മോചന കാഹളമാകണം


സബർമതിതീരം പുളകിതമായി
രഘുപതിരാഘവ മന്ത്രധ്വനിയിൽ
അതിശയമുജ്വലം ധീരമുദാത്തം
അനുപമ ജീവിത സാര സന്ദേശം

അഹിംസാ ധർമ്മം ഉജ്വലതേജം
സ്വാവലംബിത ദേശം ലക്ഷ്യം
ഹരിജനോദ്ധാരം സമരസഭാവം
സത്യാഗ്രഹം സമരസിദ്ധാന്തം

പരതന്ത്ര ബന്ധിത കുടില തന്ത്രം
സ്വാതന്ത്രത്തിൻ പഥ സഞ്ചലനം
ഐക്യമത്യ ബല സഹിത മുദാരം
നവയുഗഭാരത ജയ ജയഭേരി

ബഹു വിധഭാഷാസംസ്കൃ തി കേന്ദ്രം
അഗണിതജനമയ കേളീഗേഹം
പിതൃപദമർപ്പിതം തവപദപത്മം
ഭാരത ഭൂമി പരമം ധന്യം

അശ്രു പുഷ്പദള ഹാരമർപിതം
രക്ത പങ്കിലംദിനമിതു  ഹന്തം
ധന്യോഹം തവ  സമർപണം
ഭാരത ഭൂമീ  ഋണം ശാശ്വതം

അകകണ്ണിലൂടെ

കാണുന്നതൊന്നും കഥയല്ല തന്നെ
കേൾക്കുന്ന കഥനവും നിജമല്ല കേള്

കാലത്തിനൊത്തുള്ള മാറ്റങ്ങളാണിവ
സൽവ്വത്ര ഭുമിയിൽ മറിമായമെങ്ങും

ചൊല്ലുന്ന വചനത്തിൽ മധുരം പുരട്ടി
തന്നുടേ കേമത്തം ഊതി പെരുക്കി

അന്യൻറെ കുറ്റങ്ങൾകടിവരയിട്ട്
ആഭിജാത്യത്തിൻ മേൻപൊടി ചേർത്ത്

വടിവുള്ളൊരക്ഷരകൂട്ടുകൾ ചേർത്ത്
 മിഴിവുള്ളദൃശ്യ കാഴ്ചയൊരുക്കി

സുന്ദരിമാരുടെ കളമൊഴി ഭാഷയിൽ അൽപമൊരാംഗലേയം കലർത്തി

ഔന്നത്യ ചിന്തതൻ മറയത്തുനിന്ന്
കപടമാമാദർശ  മുഖപടമണിഞ്ഞ്

സത്യത്തെ വികൃതമായ് ചായം പുരട്ടി
തെറ്റിനെ ശരിയായി മാറ്റം വരുത്തി

ലഘുതരമായോരു വിഷയത്തെ അതി
ഗുരുതരമായി  കാട്ടിക്കൊടുത്ത്

വാണിഭ രാഷ്ട്രീയ മാദ്ധ്യമ ഭീമൻമാർ
നേട്ടങ്ങൾ കൊയ്യുന്ന നവീന  സംസ്കാരം

പൊതുജനമമ്പമ്പ വായും പൊളിച്ച്
മുങ്ങി നിവരുന്നു മായകടലിൽ

ശരിയേത് തെറ്റേത്
വിനയാകുംമൊഴിയേത്
വിനിമയ സ്വാതന്ത്ര്യത്തിനതിരുകളില്ല
ഏതുമറിയാതുഴറിനടപ്പവർ
ചതിയുടെ കുഴികളിൽ
വീണു നശിക്കുവോർ

ജ്ഞാനതുണീരങ്ങൾ സജ്ജമായീടണം
അറിവിൻറെ പടവാള്
കൈയ്യിലോങ്ങീടണം
കാണുന്നതെല്ലാം  മകക്കണ്ണിലൂടെ
കാണാകഥകൾ കാണുമാറാകണം
കേൾക്കുന്ന വാക്കുകൾ ധിഷണയുടെ ചൂളയിൽ വിഷമുക്തമാക്കി
ഗ്രഹിച്ചുകൊള്ളേണം

അറിവുംമകക്കണ്ണു മുള്ളോരു
ജനമണു
നിജമായും
 നമ്മുടെ സദ്ഭരണ കർത്താക്കൾ

 പ്രസവ വാർഡ്
ഉത്കണ്ഠയും
നിരാശയും
സന്തോഷാ തിരേകവും
കടുത്തദുഖവും
പ്രാണ വേദനയും
ആനന്ദ കണ്ണീരും
ദുഃഖവും
സ്നേഹവും
ലാളനയും
ശാസനയും
തലോടലും
പുരുഷനും
സ്ത്രീയും
ജനനവും ........
വേർതിരിവില്ലാതെ ഒത്തുകൂടുന്ന സ്ഥലം
വീണ പാണിധാരിണീ
സിദ്ധി ബുദ്ധി ദായിനി
സർവ്വ പാപ ഹാരിണീ
ചിന്മയീ മനോഹരീ

ദുഷ്ടജന സംഹാരിണീ
ഖട്ഗ ശുലധാരിണീ
അസുര വർഗ്ഗ മർദ്ദിനീ
ചണ്ഡികേ ഭയങ്കരീ

ക്ഷിപ്രവര പ്രസാദിനീ
സജ്ജന പരിപാലിനീ
ലോക സൗഖ്യ കാരിണീ
സർവ്വ ലോക രഞ്ജിനീ

ആദിശക്തി മോഹിനീ
കദമ്പ മദ്ധ്യ വാസിനീ
ശൈലേന്ദ്ര രാജ നന്ദിനീ
ആദിശക്തി രുപിണീ

ഭക്തജന ഹർഷിണീ
കാരുണ്യ വർഷിണീ
പരബ്രഹ്മ സ്വരുപിണീ
കാത്തുകൊൾക ധരണിയെ

ജന മന കാഹള ഭേരീനിനാദം

ജനമനം
അതി സുക്ഷ്മം
ജനഗണം
അതിശക്തം
ജനരോഷം
ഭയാനകം
ജനഹിതം
അനിവാര്യം
ജനചേതന
സാമൂഹികം
ജനപഥം
വ്യവസ്ഥിതം
ജനപക്ഷം
ഭരണമാർഗ്ഗം
ജനക്ഷേമം
അനുപേക്ഷണീയം
ജനവികാരം
സംവേദനാത്മകം
ജനദ്രോഹം
അക്ഷന്തവ്യം
ജനമതം
പരമ സത്യം
ജനവിധി
അതികഠിനം
ജനാധിപത്യം
സർവ്വശക്തം
ഉത്തുംഗശൃംഗത്തിലുത്തമനായി
സദ്കർമ്മ പാതയിൽ ഉത്സുകനായി

അത്തലൊഴിഞ്ഞൊരു ചിത്തവുമായി
കത്തി പടരുന്നോരാവേശമായി

വിത്തമോഹങ്ങൾ ചിത്തത്തിലില്ലാതെ
പത്തിവിടർത്തുന്നൊരാത്മവിശ്വാസവും

മൂത്തവരൊടെന്നും നമ്ര ശിരസ്കരായ്
ഭക്തിയ്ക്കുയുക്തിയും പക്വവ്യാപാരവും

കീർത്തിയോടൊട്ടുമെ ആർത്തിയില്ലാതെ
ആർത്തനായ്കേഴുന്നവർ ക്കു തുണയായി

ഓർത്തിടും മാലോകർ, എന്നുമവരുടെ
കീർത്തിപരന്നിടുമെന്നതു  നിർണ്ണയം

നേരിനെ അറിയുവാൻ
നേരേചരിക്കുവാൻ
നന്മയെ പുൽകുവാൻ
നല്ലവാക്കോതുവാൻ
പുതുമയെ കൊള്ളുവാൻ
പഴമയെ ഓർത്തിടാൻ
തിന്മയെ വെല്ലുവാൻ
ഗുണമുള്ളതെഴുതുവാൻ
ഗുരുവിനെ അറിയുവാൻ
അറിവുപകരുവാൻ
ധീരനെ വണങ്ങുവാൻ
 വീര്യമുണ്ടായിടാൻ
വ്യഥിതനെ താങ്ങുവാൻ
വ്രണിതനെ കാക്കുവാൻ
പരനെ ചതിക്കാതെ
ചരാചരസർവ്വത്തെ
സ്നേഹത്താൽ മൂടി
നേട്ടത്തിലെളിമയും
കോട്ടത്തിൽ ഖേദവും
ഫലമോഹമില്ലാതെ
കർമ്മ നിരതനായീടുവാൻ
ദുഖ സുഖത്തിൽ
സമചിത്തനായിടാൻ
ബുദ്ധിയും ശക്തിയും
ഭക്തിയും പ്രാപ്തിയും
തന്നെന്നെ
കാത്തു കൊള്ളേണമേ
ലോകമാതാവേ.............

അനാഥ......
ചിതലരിക്കുന്ന ഭിത്തികൾ
ഞരങ്ങുന്ന പലകകൾ
പൊടിവിതറുന്ന മച്ച്
ചിലന്തികൾ മാറാല കെട്ടിയ ജനാല
പഴമയുടെ മണം പേറുന്ന പഴന്തുണികൾ
മാതൃസ്നേഹം തുളുമ്പുന്ന ഹൃദയം
അസ്വസ്ത്ഥ ചിത്തം
ചുളിഞ്ഞു പഴകിയ ദേഹം
കൃശഗാത്രം താങ്ങാനാവാതെ കാലുകൾ
ഒന്നുനിവർത്തുവാൻ കൊതിക്കുന്ന നട്ടെല്ല്
താങ്ങില്ലാത്തൊരമ്മയ്ക്ക് താങ്ങായിനിൽക്കുന്ന കൈവടി
ഒരു നൂറുനാവായി ചെറുമക്കൾതന്നുടെ ചെറുതായ വികൃതികൾ
ഓർത്തുചിലയ്കുന്ന നാവ്
ഉറ്റവർതന്നുടെ കാൽപെരുമാറ്റത്തിനായ്
കാതോർക്കുന്ന കാതുകൾ
ഇടുങ്ങിയ വഴികളിൽ മുക്കിയും
മൂളിയും ചലിക്കുന്ന ശ്വാസം
നഷ്ട വസന്തത്തിൻപ്രിയനായകൻറെ വശംകെടുത്തുന്ന ഓർമ്മകൾ
ചെറുവിരലനക്കത്തിലുംഭയപ്പാടിൻറെ ഉടുക്ക് കൊട്ടുന്ന നെഞ്ചകം അനായേസേന മരണ
മതി ശീഘ്രം എന്ന പ്രാർത്ഥന
എല്ലാമറിയുന്ന ദൈവം
ഇവയുടെയൊക്കെ  ആകെത്തുകയായ
ആർദ്രമായ രണ്ട്

ലളിതം മനോഹരമായിടേണം
ഭവനമീഭുവനത്തിനൊത്തീടേണം
മാരുതനോടിക്കളിച്ചീടേണം
ശീതോഷ്ണസുരഭിലമായിടേണം
ചോരഭയമതുണ്ടാവരുത്
സമ്പാദ്യം ചോരുമാറാകരുത്
ആവരവർഭാവം വെടിഞ്ഞു നന്നായ്
ഒരുമയോടൊത്ത് കഴിഞ്ഞീടേണം
പ്രകൃതിയുമൊത്തിണങ്ങിടേണം
വികൃതിളൊന്നുമേകാട്ടിടാതെ
നല്ലസമൂഹത്തിൻ പ്രാങ്കണത്തിൽ
അണുരൂപമായിവിളങ്ങിടേണം
അങ്കണം ചുറ്റിലുണ്ടാകേണം
കൂപമൊരുകോണിലായിടേണം
മാലിന്യമൊഴുകാതിരുന്നീടേണം
ജലമൊക്കെഭൂമിയിലാഴ്നിടേണം
മാലിന്യമൊക്കെയൊതുക്കിവച്ച്
വളമായീതീരണമവിടെതന്നെ
ഒരുകറിതോട്ടത്തിനാമാലിന്യം
പോഷകദ്രവ്യമായ് തീർന്നിടേണം
ചെറുതായൊരുപവനമവിടെവേണം
നയനമനോഹര പുഷ്പജാലങ്ങളും
ഔഷധഗുണമുള്ള ചെടികളും പിന്നെ
കായ് ഫലമുള്ള വൃക്ഷലതാദികളും
നിത്യവും ചെറുതായി പാലിക്കേണം
വർഷത്തിലൊന്നു മിനുക്കിടേണം
നിത്യവും ദീപം തെളിച്ചീടേണം
ഐശ്വര്യ സമ്പുഷ്ടമായിടേണം

എതിരേവരുന്നവനപരനെന്നാകിലും
ഒരു ചെറുപുഞ്ചിരി അധികമാവില്ലെടോ
പകരമൊരുപ്രതികരണമവനിലില്ലെങ്കിലും
ഇരുവരിലുമകതളിരിലലിവേറെയുണ്ടാം

ഹൃദയങ്ങൾതമ്മിലുള്ളകലങ്ങളേറുന്നു
അഹമെന്നഭാവംഅകതാരിൽ വിളയുന്നു
അരികിലുള്ളവർതമ്മിലൊരുമയില്ലേതും
അവരവർതന്നുടെ ഇരുൾപൂണ്ടലോകം

മനുജരുടെമനതാരിൽ കുളിർമഴപെയ്യുവാൻ
അവരുടെ യകതാരിൽ ഒരുപുവിരിയുവാൻ
ഒരുനറുപുഞ്ചിരികടമായിനൽകിടാം
ഒരുനല്ലസൗഹൃദകൂട്ടമായ് വാണിടാം
എന്നിലെ ഉണ്ണീ നീ ഉറങ്ങല്ലെ
നിന്നിലെ കളിചിരി ഒളിമങ്ങിടല്ലെ

നിഷ്കളഭാവം നിരുപമരൂപം
നിർദോഷമായുള്ള
 കുസൃതികൾ വികൃതികൾ
നിർഭയമമ്മതൻ
ചാരെ മയങ്ങുന്ന
നിർമല നിർമമ
മായോരു പൈതൽ

എന്നിലെ ഉണ്ണീ നീ ഉറങ്ങല്ലെ
നിന്നിലെ കളിചിരി ഒളിമങ്ങിടല്ലെ

ഗതകാല ചരിതത്തിൻ
കയ്പുള്ള നിനവുകൾ
പരുഷതയുടെ മയമുള്ള
ചുറ്റുവട്ടങ്ങളും
അതിലേറേ ഛലകപട ഗതിവിഗതികളൊക്കെയും
ഘനീഭുത മായിതോ
തരളിതമാം മനം

എന്നിലെ ഉണ്ണീ നീ ഉറങ്ങല്ലെ
നിന്നിലെ കളിചിരി ഒളിമങ്ങിടല്ലെ

ദുഖത്തിലുച്ചത്തിൽ
പൊട്ടിക്കരഞ്ഞിടാൻ
മോദത്തിലുല്ലാസ
പൂത്തിരി കത്തിക്കാൻ
ചടുലമായാനനന്ദ
ചുവടുകൾ ചേർത്തിടാൻ
ഒരു ഈണമെപ്പോഴും
പാടിനടക്കുവാൻ

എന്നിലെ ഉണ്ണീ നീ ഉറങ്ങല്ലെ
നിന്നിലെ കളിചിരി ഒളിമങ്ങിടല്ലെ

സഹജൻ്റെ തോളത്തു
കൈ വച്ചൂ നീങ്ങിടാൻ
അനുജനെ കൊഞ്ഞനം
കാട്ടി ചൊടിപ്പിക്കാൻ
സോദരിമാരുടെ
ജഡയാട്ടി കളിച്ചിടാൻ
തൊടിയിലെ മൂവാണ്ടൻ
മാങ്ങയെറിഞ്ഞിടാൻ

എന്നിലെ ഉണ്ണീ നീ ഉറങ്ങല്ലെ
നിന്നിലെ കളിചിരി ഒളിമങ്ങിടല്ലെ

പ്രകൃതിയുടെ കൗതുക
കാഴ്ചകൾ കണ്ടിടാൻ
അമ്പിളിമാമനെ
കണ്ടങ്ങിരിക്കുവാൻ
താരകളൊത്തു
കൺചിമ്മികളിക്കുവാൻ
മഴയത്തു മുറ്റത്ത്
ഓടിക്കളിക്കുവാൻ

എന്നിലെ ഉണ്ണീ നീ ഉറങ്ങല്ലെ
നിന്നിലെ കളിചിരി ഒളിമങ്ങിടല്ലെ

ഉണരുക നീയുണ്ണി
 പരിഭവം വേണ്ട
എല്ലാം മറന്നങ്ങു
പുഞ്ചരിച്ചീടുവാൻ
 ആമോദമാഹ്ലാദ
ചിത്തനായ് വാഴുവാൻ
ആയിരം പുത്തിരി
മനസ്സിൽ  തെളിയുവാൻ

എന്നിലെ ഉണ്ണീ നീ ഉറങ്ങല്ലെ
നിന്നിലെ കളിചിരി ഒളിമങ്ങിടല്ലെ
ഞാനും അവനും
ചില അരാഷ്ട്രീയ വാദികളും.........
ഞാനും അവനും കളിക്കളത്തിലാണ്
ഞാൻ ജനസേവകൻ
അവൻ ജനവിരുദ്ധൻ
ഞാൻ  നല്ലതു മാത്രം ചെയ്യുന്നു
അവൻ മോശം മാത്രം
എല്ലാവരും എൻറെ ഭാഗത്താവണം
അവൻറെ കൂടെ ആരും ഉണ്ടാകരുത്
ഞാൻ ചെയ്തതിനു  തെളിവില്ല
അവൻ ചെയ്തതിനു തെളിവു വേണ്ട
ഞാൻ ചെയ്തതായി പറയുന്നവർ
അവൻറെയാൾക്കാർ
എന്നെ പുകഴ്തുന്ന പത്രം
മാദ്ധ്യമ ധർമ്മം കാത്തു രക്ഷിക്കുന്നു
അവനെ പുകഴ്തുന്നത്
 മഞ്ഞ പാർട്ടി പത്രം
എൻരെ വീഴ്ചകൾ
അവൻരെ ഗുഢാലോചന
അവൻറെ നേട്ടങ്ങൾ
നിങ്ങളുടെ കണ്ണിൽ പൊടിയിടാനുള്ള തുക്കടാ വിദ്യകൾ
ഞാൻ സ്വരൂപിക്കുന്ന പണം
പാർട്ടി ഫണ്ട്
അവൻ സ്വരൂപിക്കുന്നത് കോഴ
ഈ കളി ഞങ്ങൾ പരസ്പര ധാരണയോടെ
മാറി മാറി കളിക്കും
ഞങ്ങളുടെ രഹസ്യങ്ങൾ ഞങ്ങൾക്ക് പരസ്പരമറിയാം
അതുകൊണ്ട് പരസ്പരം മുക്കികൊല്ലില്ല.േ
കളത്തിനു പുറത്തുള്ളവർ
ചില്ലറ ലാഭത്തിനായി
ഞങ്ങളോടൊപ്പം ചേർന്നു കൊള്ളുക
ഈ കളി ഇഷ്ടമില്ലാത്തവർ
അരാഷ്ട്രീയ വാദികൾ


തുടർകഥ......

അത്യാഹിത വാർത്ത കേട്ട് അയാൾ ഞെട്ടിയില്ല.

നാളത്തെ പത്ര വാർത്തകളെ കുറിച്ചായി അയാളുടെ ചിന്തകൾ

 ഒന്ന് ആരോപിക്കും മറ്റേത് നിഷേധിക്കും

ചാനലുകൾ ആഘോഷിക്കും

പരിജനങ്ങൾ കണ്ണീർ വാർക്കും

 മറ്റു ചിലർ മുതലകണ്ണിർ വീഴ്ത്തി മുതലെടുക്കും

പോലീസ്   സി ബി ഐ രംഗത്തെത്തും

രാഷ്ട്രീയ അജണ്ട  എന്ന് ചിലർ

തങ്ങൾക്ക് പങ്കില്ലെന്ന് ചിലർ

കരിങ്കൊടി,  ലാത്തി പിന്നെ .......

സുഭിക്ഷമായ ഹർത്താൽ

 വഴിമുട്ടിപോയവർ.......

സോറി.....ഒരു അത്യാഹിതം കൂടി ആസൂത്രണം ചെയ്യേണ്ടി വന്നു.

ഒന്ന് കെട്ടടങ്ങി മറ്റേത് ആളികത്തി
                                                    (തുടരും....)
കാവ്യാർക്കനാഴിയിലൂളിയിട്ടു.
ഒരുപകലിവിടെ യൊടുങ്ങിടുന്നു
ഇരുളാകെ ഭൂവിൽ പടർന്നിടുന്നു 
ഒരു വിങ്ങലുള്ളിലുണർന്നിടുന്നു

ഒരു തിങ്കൾ ശോഭയുണ്ടെന്നാകിലും
ഒരു പ്രഭാതത്തിനായ് കാത്തിരിപ്പൂ
ഒാ-ർമകൾ എൻ - വി-ഹായസിൽ
ഒ എൻ വി യായി നിറഞ്ഞു നിന്നു

കിളികുല ജാലത്തിൻ കളകൂജനം
അവ പൊഴിക്കുന്നോരു പട്ടുതൂവൽ
ഭുവിലെ ആർദ്രമാം നേത്രങ്ങളും
അലയുന്ന മനസ്സിലെ ഗദ്ഗദങ്ങൾ

പ്രണയാർദ്രമായോരു നടനവേദി
അലിവുള്ള മനസിൻറെ സർഗ്ഗ കേളി
പുഴയുടെ കളകള നിസ്വനങ്ങൾ
പാഴ്മുളം തണ്ടിലെ ബാംസുരിയും

ഭൂമിമാതാവിൻറെ ചുടു നിസ്വനം
മാനത്തു തെളിയുന്ന മഴവില്ലൊളി
വിധിമതമറിയുന്ന ചുടുകണ്ണുനീർ
മനസിലുരുകുന്നൊരാത്മരോഷം

ഇരുളിൻറെ മറവിലെ കപടതയും
പിച്ചനടക്കുന്ന പെൺകിടാവും
വ്രണിത ദേഹത്തിന്നൊരുസാന്ത്വനം 
നൃത്തം ചവിട്ടുന്നു മനോ മണ്ഡലത്തിൽ

ഹിമകണ മേറ്റു തളിരിടുവാൻ
പുതു നാമ്പുകളുണ്ടു വെമ്പി നിൽപൂ.
തളരുന്ന ഭൂമിക്കൊരുർജ്ജമായി
വരുമോ ഒരുനൂറു കാവ്യ സൂര്യോദയം


അങ്ങുകിഴക്കൊരു പാറപുറത്താണു
എൻറെ പ്രിയപെട്ട വിദ്യാലയം

ആദ്യാക്ഷരങ്ങൾ തൻ മുകുളങ്ങൾ  തളിരിട്ട
ആരാമ മന്ദിരം വിദ്യാലയം

പ്രഥമ വന്ദിതൻ ഗജാനനൻ തന്നുടെ
നാമത്തിലാണീ പ്രഥമാലയം

കരിമ്പുവളപ്പും ഗുളിക തറയും
 ചേരുന്ന പഴയോരു വിദ്യാലയം

പാറയുംമുള്ളും ചരലും ചവിട്ടി ഓടിതിമിർത്തോരു നൃത്താലയം

ചക്കര പ്ലാവിൻറെ തണലിൽ
തിമർക്കുന്ന  കുട്ടികൾ തന്നുടെ  കാര്യാലയം

ഗോരിയും കോട്ടിയും പള്ളിയും
 സോഡ്ദി തലേമ്മ അരങ്ങിലെത്തും

ഗോ....വിന്ദ.....യെന്നുച്ചത്തിലലറി
ഭജനമിരിക്കുന്ന പുണ്യ കാലം

തൂവെള്ള വസ്ത്രം ധരിച്ച ഗുരുവിൻ്റെ
പാഠങ്ങൾ വിസ്മയമായ  കാലം

സ്വാദൂറും സജ്ജിഗ ആവോളം ഭക്ഷിച്ച്
 എരിയടക്കുന്നോരു പോയ കാലം

കോഴി കുണ്ടിയും, പാലൈസുമെള്ളുണ്ടയും
കട്ളീസും തിന്നു നടന്ന കാലം

നെല്ലിക്ക പുളിങ്കുരു  കാക്കതൊണ്ടിയും
ചെനയുള്ള മാങ്ങയും തിന്നകാലം

ഇടവേളനേരത്ത് പൊതു ടാപ്പിലെ വെള്ളം
ആവോളം മോന്തികുടിച്ച കാലം

 ഒരുനാളസംബ്ലിയിൽ എല്ലാരു മൊന്നായി
ഭാരതാംബയ്ക്കു   ജയ് വിളിച്ചകാലം

മലയാള കന്നട  തുളുവാദി ഭാഷകൾ
 കൈകോർത്തു  നടന്ന വസന്ത കാലം

മൂക്കട്ടയൊലിപ്പിച്ച് ഒട്ടിയ വയറുമായ്
അടികൊണ്ടു വാവിട്ടു കരഞ്ഞ കാലം

കുസൃതികൾ കാട്ടി അടിപിടി കൂടി
ഉച്ചത്തിൽ വായിട്ടലച്ചകാലം

ഒരു കൈയ്യിൽ  നിക്കറും മറുകൈയ്യിൽ
സ്ലേറ്റുമായ് മഴയും നനഞ്ഞു നടന്ന കാലം

ജനഗണമന തീർന്ന് മണിയൊച്ച കേൾക്കുമ്പൊൾ
ചടപടെയോടിയകന്ന കാലം

മണ്ണിൻ്റെ മണമുള്ള വിണ്ണിൻറെ ഗുണമുള്ള
ഓർമയിൽ മാറാത്ത സുവർണ്ണ കാലം


വീടിന്നു പൂമുഖം
വായനയ്ക്കാമുഖം
ഒരുവന്നു പലമുഖം
അതിലൊന്നു നിജ മുഖം
അലിവിന്നു നൻമുഖം
ചതിവിന്നു പൊയ്മുഖം
സ്നേഹത്തിനൊരുമുഖം
പ്രേമത്തിൻ മറുമുഖം
ഹിംസയ്ക്കു കരിമുഖം
അതിജീവനത്തിനായ് പൊരുതുന്നതൊരുമുഖം
ജ്ഞാന പ്രഭാപൂർണ്ണമായുള്ള ഗുരുമുഖം
സഹജമീമനുജർക്ക് ഈ വിധം പലമുഖം
മനമുണ്ടോ
ഉണ്ടെങ്കിൽ
വനമുണ്ട്
ഇടതൂർന്നതരുവുണ്ട്
നരിയുണ്ട് കരിയുണ്ട്
അരുവിയും കുരുവിയുമൊക്കെയുണ്ട്

കിളിയുണ്ട്
കളിയുണ്ട്
കാറുണ്ട്
ആറുണ്ട്
ഫലമുണ്ട് ഭയമുണ്ട്
നേരും നെറിയും കൂടെയുണ്ട്

ഇലയുണ്ട്
പൂവുണ്ട്
കായുണ്ട്
തേനുണ്ട്
ഇടയിലാകാട്ടിൽ
സഹവസിക്കുന്നോരു മനുഷ്യനുണ്ട്

തണലുണ്ട്
കുളിരുണ്ട്
ഭൂമിയ്ക്കു കുടയുണ്ട്
മഴ പെയ്യുവാനുള്ള കോപ്പുമുണ്ട്
അമൃതൂറും ഫലമുണ്ട്
രോഗ ശമനത്തിനായിരം വേരുമുണ്ട്

ഒന്നു മറ്റൊന്നിനു
ഇരയായും വളമായും
തീറ്റയ്കു  വകയായും
 സമരസ ജീവിത സന്ദേശമുണ്ട്
പാഴാക്കാനൊരു തുള്ളിയില്ലയെന്നോമനെ
ജലം പാരിലമൂല്യമാണറിക

ഓടികിതച്ചെത്തി പാളയിലെ വെളളം
 നീ യാവോളം മോന്തി  കുടിക്കുന്ന കാഴ്ചയും

ചാടിതിമർക്കുമ്പോൾ  ചിന്നി
ചിതറുന്ന  തുള്ളിയും
സാകൂതം കാണുവാനക്ഷമൻ ഞാൻ

വാടിക്കരിഞ്ഞ തൊടിയിലെ  മുല്ല
മാടി വിളിച്ചു കരഞ്ഞിടുമ്പോൾ

ഇത്തിരിപോരുന്ന പക്ഷി മൃഗാദികൾ
ഇറ്റു ജലത്തിനായ് കേഴുമ്പോഴും

അവനിയിലതിനായി കരുതേണമോമനേ
ധരണി ചുരത്തണം അമൃത ജലം

 ഗതിവേഗ മേറിയ ഉലകിലെ യാത്രയിൽ
പരവശനായ് നീയലഞ്ഞിടുമ്പോൾ

ഇറ്റു തെളിനീരി നായ്  നീ
കൊതിച്ചിടുമ്പോൾ

 സുലഭമായ് വരുകില്ല ഒരുകവിൾ  തണ്ണീർ
മനതാരിലിന്നു നീ ഓർത്തുകൊൾക

കണ്ണിന്നു കുളിരാകും നിളയുടെ കളകളം
ഇനിയെത്ര  നാളുയർന്നു പൊങ്ങും

പെയ്യാൻ മടിച്ചിടും  മഴമേഘജാലങ്ങൾ
നിന്നുടെ സ്വൈര്യം കെടുത്തുമല്ലോ

അവസാന തുള്ളിയു മൂറ്റിയെടുക്കാനായ്
ദുരമൂത്ത ജീവികൾ നിന്നരികിലെത്തും

ഉണ്ണീ നീയെന്നുടെ ഉദകജലത്തിനായ്
അലയുന്ന വിഗതികളുണ്ടായിടൊല്ലെ

ജലമാണ് ജീവൻ  തെളിനീരമൃത്
ശുദ്ധജല വായു  നാടിനനുഗ്രഹവും

പർഞ്ഞോൻ കുഡ്ങ്ങി

പർഞ്ഞിറ്റ് തോറ്റു

പറേമ്പൊ പറേന്ന് കുഡിച്ചിറ്റ് പറേന്നേന്ന്

പറയാണ്ടെങ്ങനെ

പറേണ്ടെ പിന്ന പറേണ്ടെ

പറയാണ്ടിരിക്കാൻ മൻസൊക്കണ്ടെപ്പാ

പറയുന്നോറ് പറയട്ടല്ലോ

അയിനെന്ത്യേന പറയാനില്ലെ

ഓറോർക്ക് പറയാനിള്ളദ്
ഓറോറ്  പറയട്ട്

പറയുന്നോറെ പറയാൻ ബിഡണം

അല്ലാണ്ട് ഓറ എഡങ്ങേറ് ആക്കന്നെന്ത്യേന്

പറയുന്നോറെ പറയാൻ ബിട്ടില്ലെങ്ക്
പറയാൻ കയ്യ
പിന്നെ എന്താവൂന്ന്

പിന്ന......പറേന്നോറ്
 പറയുമ്പോ  കൊർച്ച് ജാഗ്രദ  ആക്കണം

എന്തേച്ചെങ്ക് പറഞ്ഞ ബാക്ക്   ബൈയ്യോക്കിഎഡ്കാനാവേല


ഒരുനാളെന്നുടെ ഭവനത്താലങ്ങാടി
കുരുവികളൊരു ചെറു  കൂടുകൂട്ടി

ചകിരിതൻ നാരുമങ്ങാടി ചരടും
പുൽകൊടികളുംകൊണ്ടൊരു കൊച്ചുകൂട്

നല്ല നിമിത്തമിതെന്നു കരുതി  ഞാൻ
ചെന്നു നിരീക്ഷിച്ചാ കുഞ്ഞുകൂട്

ഭിത്തിയിലെ ന്നോളം പൊക്കത്തിൽ
കുന്നുപോലുള്ളൊരു  കൂമ്പാരം

ദിനപത്രം  വാരിക മാസികയും
ബാലരമയുമമ്പിളിയമ്മാവനും

മച്ചിനു താഴെ വിടവിലായ് കൂടിനായ്
കുരുവികൾ കണ്ടൊരു നല്ലോരിടം

ഇളകിയോരാണിയും  തൂങ്ങുന്ന കടലാസും അദ്ഭുതമവിടെയിരിക്കുന്നു

അസ്ഥിരമാ കൊച്ചു ഭവനത്തിലങ്ങാടി
കുരുവികളൊരു ദിനം മുട്ടയിട്ടു

ഓർക്കയാൽ മനുജൻറെ അസ്ഥിത്വവും
ഇതിലേറെ അസ്ഥിരമാണു നൂനം

വൈകാതെ കേട്ടു ഞാൻ കുഞ്ഞി
 കുരുവികൾ തന്നുടെ  ചിലമ്പലുകൾ

കലപിലകൂട്ടിയങ്ങാടിക്കുരുവികൾ
മതിമറന്നങ്ങതാസ്വദിച്ചു

അകതാരിലാധി പെരുകിയനുദിനം
നിലം പൊത്തുമോ ഈ കുരുവിക്കൂട്

ഒന്നു മറിയാതെ അമ്മക്കിളി
അനായാസമായതിൻമേൽ പറന്നിരുന്നു

കലപില കൂട്ടുമാ  കുരുവി കിടാങ്ങൾക്കു
 ചിറകുമുളയ്ക്കാനായ്  കാത്തിരുന്നു

അതിവേഗമവയൊന്നു പാറിയകന്നെങ്കിൽ.... കരളുരുകിയന്നുഞാൻ   പ്രാർത്ഥിച്ചു

ദുർനിമിത്തം വന്നാലാപത്തു വരുമെന്ന്
പലരുമന്നെയന്നോർമ്മിപ്പിച്ചു

ഓ രോനിമിഷവും വൻ വീഴ്ച പ്രതീക്ഷിച്ച്
ആകുല ചിത്തനായ് ഞാനിരുന്നു.

ഒരു രാവിലാക്കുടും കെട്ടുകളും
 പെരിയോരു ശബ്ദമോടെ നിലം പതിച്ചു

അശനിപാതം കണക്കെന്നുടെ നെഞ്ചിൽ
 ഇടിനാദമായതു  പതിച്ചു

കുരുവികുഞ്ഞുങ്ങളെന്തു പിഴച്ചു ഹാ
പുസ്തകകെട്ടിൽ ഞെരിഞ്ഞമരാൻ

കേട്ടിലവയുടെ കുഞ്ഞു രോദനവും
ത്രാണിയു ണ്ടായീല പോയി നോക്കുവാനും

വരുവാനിരിക്കുന്ന ദുർനിമിത്തങ്ങൾ
നടമാടിയെൻറെ മനോ മണ്ഡലത്തിൽ

കണ്ണും പൂ ട്ടിയുറക്കമില്ലാതെ
പുലരും വരെ തേങ്ങി ഞാൻ കിടന്നു.

കുരുവികൾ തന്നുടെ കലപില കേട്ടു
ത്ധടിതിയിലെത്തീഞാൻ പുമുഖത്ത്

ചിറകുമുളച്ചൊരാ കുഞ്ഞിക്കുരുവികൾ
ചലപില കൂട്ടിയിരിക്കുന്നു

ഏറിയമോദത്താൽ കുരുവി സമൂഹം
വിടപറയും പോലെ യെനിക്കു തോന്നി

ചിതറിയ കൂടും പൊട്ടിയ പലകയും
 പഴകിയ പത്രവും പെറുക്കുന്ന നേരം

അതുവരെ യവയെ താങ്ങി നിറുത്തി
യവനെ മനസാലെ കൈ വണങ്ങി





 വീണാധാരീ വാണീ മണി
സുരഗണ വന്ദിത മനോൻമണീ

പുസ്തക ധാരെ ബ്രഹ്മ മാനസീ
ബുദ്ധി പ്രദേ ദേവീ സുജന കല്യാണീ

കാവ്യ നൃത്യ ഗാന രഞ്ജിനീ
സുഭാഷിണീ മഞ്ജുള രൂപിണീ

പത്മാസന സ്ഥിതേ മന്ദഹസിതേ
പത്മവിലോചന  ഭുവന മനോഹരീ

 ഭക്തി  ശക്തി മുക്തി പ്രദായിനി
ദുഷ്ട സംഘ നിഷേധിനി മാതേ

പുണ്യ കാര്യ കർത്തിനി ശുഭജേ
മോക്ഷ മാർഗ്ഗ പ്രദർശിനി  മംഗളേ

ദിവ്യ രൂപ ധാരിണീ  ജനനീ
അഷ്ട ദ്രവ്യ സേവിത സംപൂജ്യേ

ക്ലീ ക്ലീ ക്ലീ ക്രൂ ക്രൂ ക്രൂ.......

ജൂനിയർ സുരേശ് തിരിഞ്ഞു നോക്കിയില്ല

മുറ്റത്തെ മൈന നിരാശനായി.

ജൂനിയർ സുരേശ് ഡാഡിയുടെ പുതിയ ആൻഡ്രോയിഡ് ഫോണിലെ പ്ലേ സ്റ്റോറിൽ നിന്ന് പുതിയ ഗെയിം ഡൗൺ ലോഡ് ചെയ്യുകയാണ്.

ക്ലീ ക്ലീ ക്ലീ ക്രൂ ക്രൂ ക്രൂ.......

മൈന നിരാശനായി മുറ്റത്ത് അങ്ങിങ്ങായി തത്തി കളിക്കുകയാണ്.
ഗെയിറ്റിനു മുകളിലും ഉമ്മറപടിയിലും ചെന്നിരുന്ന് അവൻ ജൂനിയർ സുരേശിനെ വിളിച്ചു .
ക്ലീ ക്ലീ ക്ലീ ക്രൂ ക്രൂ ക്രൂ.......

ഇല്ല ....   ജൂനിയർ  സുരേശ് അവന് അനുവദിച്ചു കിട്ടിയ സമയം പരമാവധി ഉപയോഗപ്പെടുത്തുകയാണ്.

ക്ലീ ക്ലീ ക്ലീ ക്രൂ ക്രൂ ക്രൂ....... ജൂനിയർ സുരേശിൻറെ കൈയ്യിലുള്ള നിർജ്ജീവ വസ്തു ചിലച്ചു.

മൈന തിരിഞ്ഞു നോക്കി !!!

ഗെയിം ഡൗൺലോഡ് ആയി.ജൂനിയർ സുരേശ് മുഷ്ടി ചുരുട്ടി വീശി  തൻറെ നേട്ടം ആസ്വദിക്കുകയാണ്.

ക്ലീ ക്ലീ ക്ലീ ക്രൂ ക്രൂ ക്രൂ.......

എന്നിട്ടും ജൂനിയർ സുരേശ് തിരിഞ്ഞു നോക്കിയതേയില്ല.

രണ്ടാം ക്ലാസ്സിലെ പാഠ പുസ്തകത്താളിൽ ജീവസ്സുറ്റ കഥാപാത്രമായി നിറഞ്ഞുനിന്ന മൈന പഴകി ദ്രവിച്ച പുസ്തകം  വിട്ട് പറന്ന് എങ്ങോട്ടോ പോയി .






Friday, March 25, 2016



ഉപഭോഗ ത്തിൽ മുന്നിട്ടു നിൽകുന്ന നമുക്ക് മാലിന്യ സംസ്കരണത്തിൻ്റെ കാര്യത്തിൽ കൈ മലർത്തേണ്ടി വരുന്നു.പ്രത്യേകിച്ചും അജൈവമാലീന്യം.മണ്ണിൽ ലയിക്കാത്ത ഇത്തരം വസ്തുക്കളെ പുനഃചംക്രമണത്തിന് വിധേയമാക്കുന്നതിനുള്ള സംവിധാനം ഇന്ന് നിലവിലുണ്ട്.അതിനുള്ള സ്ഥാപനങ്ങളും കുറവല്ല.എന്നാൽ ഇത്തരം സ്ഥാപനങ്ങളിൽ ഈ പഴകിയ വ
സ്തുക്കൾ തനിയേ എത്തിച്ചേരില്ല.അവിടെയാണ് ആക്രിക ച്ചവടക്കാരുടെയുംപാഴ്വസ്തുക്കൾ ശേഖരിക്കന്നവരുടെയും പ്രസക്തി.പട്ടിയെ അഴിച്ചു വിട്ട് ഇത്തരക്കാരെ ആട്ടിയോടിക്കുമ്പോഴും ഒരു കെട്ട് പേപ്പറിന് അമ്പത് പൈസ കൂടുതൽ കിട്ടാനായി വില പേശുമ്പോഴും പ്രകൃ തിയുടെ സന്തുലിതാവസ്ഥ നില നിർത്തുന്നതിനുംഅമിതോപഭോഗത്തിന് അടിമപ്പെട്ട് പ്രകൃതിലെ വിഭവങ്ങളുടെ ശോഷണം തടയുന്നതിനും ഇവരുടെ പ്രാധാന്യം തിരിച്ചറിയണം.പാഴ്വസ്തുക്കൾ പരമാവധി വിലകിട്ടുന്നതുവരെ സൂക്ഷിച്ച്‌ കുറകൾക്കും ചിതലിനും പെരുചാഴിക്കും വിട്ടുകൊടുക്കാതെ പരമാവധി സൗജന്യമായിത്തന്നെ ആക്രിക്കാർക്ക് ലഭ്യമാക്കാൻ നാം ബദ്ധ ശ്രദ്ധരാകണം
ഇല്ല കണ്ടീല ഞാനൊന്നുമെ ഈഭൂവിൽ.
എന്തിനോ വേണ്ടിയുള്ളോട്ടപാച്ചലിൽ
ആകാശനീലയിൽ ഒരു ചെറുപൊട്ടായി
പാറിപറക്കുന്ന കൊച്ചു പറവകൾ
കുന്നിൻ ചെരിവിൽ അമ്മേ മോളേന്ന്
കൂവികളിക്കുന്ന പൈയ്യും കിടാവും
ഇല്ല കണ്ടീല ഞാനൊന്നുമെ ഈഭൂവിൽ.
എന്തിനോ വേണ്ടിയുള്ളോട്ടപാച്ചലിൽ
ഏറെ വെളുപ്പിനെ പതിഞ്ഞോരു ശബ്ദത്തിൽ
മുറ്റമടിക്കുന്ന മുത്തശ്ശിയമ്മ.
തിരുനട മുന്നിൽ നിറകണ്ണുമായി
വീടിൻറെ നന്മയ്കായ് കേഴുന്നൊരമ്മ
ഇല്ല കണ്ടീല ഞാനൊന്നുമെ ഈഭൂവിൽ.
എന്തിനോ വേണ്ടിയുള്ളോട്ടപാച്ചലിൽ
വെൺമേഘ മോടൊത്ത് ഓട്ട പന്തയം
തോറ്റു ചിരിക്കുന്ന അമ്പിളിമാമൻ
ചലപില കൊട്ടി തേൻമാവിലെ മാമ്പഴം
നൊട്ടി നുണയുന്ന അണ്ണാറകണ്ണൻ
ഇല്ല കണ്ടീല ഞാനൊന്നുമെ ഈഭൂവിൽ.
എന്തിനോ വേണ്ടിയുള്ളോട്ടപാച്ചലിൽ
കുഞ്ഞിളം കാറ്റിൽ ഊഞ്ഞാലാടുന്ന
തെങ്ങോലയിലെ രണ്ടിണകിളികൾ
പാറകെട്ടിലെ വെള്ള കെട്ടിതിൽ
ഓളങ്ങൾ തീർക്കുന്ന കുഞ്ഞിളം കൂറകൾ
ഇല്ല കണ്ടീല ഞാനൊന്നുമെ ഈഭൂവിൽ.
എന്തിനോ വേണ്ടിയുള്ളോട്ടപാച്ചലിൽ
മകനെന്നു കരുതി വെച്ചുവിളമ്പിയ
അകലത്തെയമ്മതൻ നിർദോഷ സ്നേഹം
ഓടുന്ന വണ്ടിയിൽ അമ്മമടിയിൽ
മോണകാട്ടിചിരിക്കുന്ന ഒാമനപൈതൽ
ഇല്ല കണ്ടീല ഞാനൊന്നുമെ ഈഭൂവിൽ.
എന്തിനോ വേണ്ടിയുള്ളോട്ടപാച്ചലിൽ
ചക്രവാളസീമയിലൊരു രക്ത
കുടമായിതാഴുന്ന സൂര്യതേജസ്
വരിയായി നീങ്ങി പശിതേടിയലയുന്ന
കുഞ്ഞനുറുമ്പിൻറെ സൗഹൃദകൂട്ടം
ഇല്ല കണ്ടീല ഞാനൊന്നുമെ ഈഭൂവിൽ.
എന്തിനോ വേണ്ടിയുള്ളോട്ടപാച്ചലിൽ
ഇന്ന് ലോക റേഡിയോ ദിനം. അദ്ഭുത വേഗത്തിൽ മാറികൊണ്ടിരിക്കുന്ന നമ്മുടെ ജീവിത സാഹചര്യത്തിൽ നാടും വീടും പഴമയും മറക്കാതെ നന്മയുടെ നറു തേൻ തുള്ളികൾ നമുക്കായ് സൂക്ഷിച്ചു കൊണ്ട് റേഡിയോ ഇന്നും സംപ്രേക്ഷണം തുടരുന്നു.പഴഞ്ചൻ മാദ്ധ്യമമാണെന്ന ആക്ഷേപം നിലനികെ തന്നെ ഒന്നിനും സമയം കിട്ടാതെ ഒടിനടക്കുന്ന മനുഷ്യർക്ക് ഏറ്റവും ചുരുങ്ങിയ ചിലവിൽ വിനോദവും വിജ്ഞാനവും പ്രദാനം ചെയ്യുന്ന റേഡിയോയിലേയ്ക്കുള്ള മടക്കയാത്ര ആസന്നമാണ്.പ്രത്യേകിച്ച് ശ്രദ്ധ കൊടുക്കാതെ തന്നെ നമ്മുടെ ബോധമണ്ഡലത്തിൽ ഗാനമായും വാർത്തയായും ഗൗരവമേറിയ ചർച്ചയായും ശബ്ദ വീചികൾ നമ്മേ തേടിയെത്തും.വീട്ടു ജോലിക്കിടയിലും മറ്റു കാര്യങ്ങൾക്കിടയിലും റേഡിയോ തൻറെ കർത്തവ്യം നിർവഹിക്കുന്നു.ആകാശവാണി തുറക്കുന്ന സംഗീതം ആരിലാണ് ഗൃഹാതുരമായ ഓർമയുണർത്താത്തത്.
സുഭാഷിതം കേട്ട് ഒരു നല്ല ദിവസത്തിൻറെ തുടക്കം,സംക്ഷിപ്തമായ വാർത്ത ഇംഗ്ലീഷിൽ,നാനാ ജാതി മതസ്ഥരുടെ ഭക്തിഗാനങ്ങൾ,നാട്ടു വാർത്ത,തീവണ്ടി സമയം, പ്രാദേശിക വാർത്ത,സംസ്കൃത ,വാർത്ത,കവിതാലാപനം,അതാത് ദിവസം പ്രസക്തമായ ഡോക്യുമെൻറ റികൾ,ഡൽഹി വാർത്ത,ചലചിത്രഗാനങ്ങൾ,വിവിധ കലാരൂപങ്ങൾ , യുവവാണി,ഹിന്ദി പാഠം,സംഗീത പാഠം,കച്ചേരി,ചർച്ചകൾ,റേഡിയോ നാടകങ്ങൾ,കമൻററികൾ,കഥാപ്രസംഗം,ഡോക്ടറോടു ചോദിക്കാം,നിങ്ങളാവശ്യപെട്ട ഗാനങ്ങൾ,എഴുത്തു പെട്ടി അങ്ങനെ പോകുന്നു പരിപാടികൾ.ഇതൊക്കെ മറ്റൊരു പ്രവൃത്തിയിൽ ഏർപെട്ടിരിക്കെ പരോക്ഷമായി നമുക്ക് ആസ്വദിക്കാൻ കഴിയുന്നു.നല്ല അവതരണത്തിലൂടെ ആസ്വാദകൻറെ ,ഭാവനയുണരുന്നു.മനുഷ്യൻറെ സ്ഥലകാലങ്ങൾക്കും സന്മാർഗികതയ്ക്കും ഒരുവിലയും കൽപിക്കാതെ സംപ്രേഷണം ചെയ്യുന്ന ടി വി സീരിയലുകൾക്ക് മേൽ റേഡിയോ അധിപത്യം പുലർത്തേണ്ടത് കാലത്തിൻറെ ആ വശ്യമാണ്.എഫ് എം റേഡിയോകൾ സാർവത്രികമായതോടെ ഇന്ന് നിലവാരമുള്ള ഡിജിറ്റൽ ശബ്ദം റേഡിയോയിലൂടെ ലഭ്യമാണ്. പ്രഭാതഭേരി കേട്ട് വീട്ട് ജോലി ചെയ്യുന്ന വീട്ടമ്മയും, വാർത്തകൾ കേട്ട് ലോക പരിചയവും ഭാഷാ പരിചയവും നേടുന്ന യുവതലമുറയും,കുടുംബ സദസുകളിൽ പിന്നണി പാടുന്ന ഗാന വീചികളും.ആകാശവാണി പരിപാടികൾ കേൾകുന്ന സൗഹൃദ സായാഹ്നങ്ങളും രാവേറുന്നതുവരെ വിരസതയും ആയാസവും ഒഴിവാക്കാൻ നാടകവും സംഗീതവും ആസ്വദിക്കുന്നവരും തിരികെ വരുമെന്ന് നമുക്ക് പ്രതീക്ഷിക്കാം.

Sunday, November 1, 2015


സത്യമേവ ജയതേ


ശുനക പുരാണം

അവനെകുറിച്ചു പറയാന്‍ നൂറു നാവായിരുന്നു നമുക്ക്.എന്തൊരനുസരണശീലം യജമാനഭയം,കള്ളനെയും പെറുക്കികളെയും വായനോക്കികളെയും ക്ഷുദ്രജന്തുക്കളെയും ഭയക്കേണ്ട.കരിമ്പൂച്ചയോടൊപ്പം നടക്കുന്ന മന്ത്രിസത്തമന്‍റെ ഗമയായിരുന്നു നമുക്ക്.എങ്കിലും നന്ദികേട് കാണിക്കുന്ന മനുഷ്യരെ നായീന്‍റെ മോനെഎന്ന് വിളിക്കാനും മറന്നില്ല.എന്തൊരു വിരോധാഭാസം.മനസ്സിലാക്കാന്‍ കഴിയുന്ന കാര്യം ഇതാണ്.പട്ടികളെ മനുഷ്യന്‍ ഒരിക്കലും സ്നേഹിച്ചിരുന്നില്ല.എല്ലാം നമ്മുടെ സ്വാര്‍ത്ഥത. ഭക്ഷണാവിശിഷ്ടം കൊടുത്താന്‍ മതി.പിന്നെ ഒരു മരക്കൂടും. ജീവിതത്തില്‍ ഒരു സ്വാതന്ത്ര്യവും അനുവദിക്കില്ല.സ്വതന്ത്രയമായി ഒന്ന് ഉലാത്താനോ സുഹൃത്തുക്കളോടൊത്ത് അല്‍പനേരം ചിലവഴിക്കാനോ അനുവാദമില്ല.അയല്‍പക്കത്തെ ലൌലിയോട് സല്ലപിച്ച കൈസറിനെപറ്റി എന്തെല്ലാം ഇല്ലാവചനങ്ങളാണ് പറഞ്ഞ് പരത്തിയത്.അവന്‍ ലൈനടിക്കാന്‍ തുടങ്ങിയത്രെ.എല്ലാം നമ്മുടെ ഇച്ഛാനുസരണം മാത്രം നടക്കണം.വീട്ടിലെ കൊച്ചു കുഞ്ഞിനോട് അളവറ്റ സ്നേഹം തോന്നിയപ്പോള്‍ ഒന്ന് കെട്ടിപുണരാന്‍ ശ്രമിച്ചപ്പോള്‍ കുഞ്ഞ് വാവിട്ട് നിലവിളിച്ചു.ഇതുകണ്ട് കുടുംബനാഥന്‍ പൊതിരെ തല്ലി.ഒരു വികാരപ്രകാടനത്തിനുപോലും സ്വാതന്ത്ര്യമില്ല.പതിരില്ലാത്ത പഴഞ്ചൊല്ലിലെ മോങ്ങുന്ന പട്ടിയും മുഴുവന്‍ തേങ്ങ കിട്ടിയ പട്ടിയും,ഏറ് കൊള്ളുന്ന പട്ടിയുമായി പട്ടി ഒരു പരിഹാസ പാത്രമായി തുടര്‍ന്നു.എല്ലാം സ്വാര്‍ത്ഥതയ്ക്കു മാത്രമായിരിക്കണം.പട്ടി പ്രസവിച്ചാല്‍ പ്രശ്നമാണ്. പെണ്‍പട്ടിയാണെങ്കില്‍ കടുത്തു നടപടി.ചാക്കില്‍ കെട്ടി തെരുവില്‍ കൊണ്ടുചെന്നാക്കും.കുറേ വണ്ടികയറി ചാകും.കുറേ മനുഷ്യന്‍വലിച്ചെറിയുന്ന എച്ചില്‍ ഭക്ഷിച്ച് പിടിച്ചു നില്‍ക്കും .മെലിഞ്ഞ് എല്ലുന്തിയ കില്ലപട്ടികളായിരുന്നു ഏറെയും.എങ്കിലും വിധേയരായിരുന്നു.വാല്‍ പൃഷ്ഠത്തിലൊതുക്കിമാത്രമായിരുന്നു നടത്തം. തമാശയ്ക്ക് ഓടിക്കുമെങ്കിലും തിരിഞ്ഞുനിന്നാല്‍ തിരിഞ്ഞോടുന്ന ഭീരുക്കളായിരുന്നു.കുരയ്ക്കും പക്ഷെ കടിയ്ക്കില്ല.തെരുവിലെ ജീവിതത്തില്‍അസുഖബാധിതര്‍ക്ക് പേ പിടിച്ചു.സ്വബോധം നശിച്ച അവര്‍ കണ്ടവരെയൊക്കെ കടിച്ചു.റോഡ് മുറിച്ച് കടന്നപ്പോള്‍ ബൈക്ക് യാത്രക്കാരനെ തട്ടിയിട്ടു.കുസൃതിപ്പിള്ലേരുടെ കണിശതയാര്‍ന്ന ഏറ് കൊണ്ട് കരഞ്ഞോടി. എങ്കിലും നഗരത്തിലെ യഥേഷ്ടം ലഭിക്കുന്ന അറവു മാലിന്യവും വീടുകളില്‍നിന്ന് വലിച്ചെറിയുന്ന ചിക്കന്‍ബിരിയാണിയും തിന്ന് കൊഴുത്ത് തടിച്ച് ഉന്മുക്തസംഭോഗം ചെയ്ത് വംശവര്‍ദ്ധ നവുണ്ടാക്കി.പട്ടിപിടിത്തക്കാരെത്തി.കൂട്ടകൊലയ്ക്കിരയാക്കി.ഒന്നിന് പത്ത് പത്തിന് നൂറ്.വാല് മുറിച്ച് എണ്ണമെടുത്തു.ദിവസങ്ങള്‍ പ്രായമായ പട്ടികുഞ്ഞിന്‍റെ വാലുപോലും മുറിച്ച് എണ്ണമെടുത്തു. കടപ്പുറത്ത് ചെറിയ കുഴികുഴിച്ച് മൂടി.കഴുകന്‍ വലിച്ച്പറിച്ചു. കൂട്ടത്തോടെയുള്ള പലായനത്തിലൂടെ വംശനാശത്തില്‍നിന്ന് രക്ഷപെട്ടു.വീണ്ടും പൂര്‍വ്വാധികം ശക്തിപ്രാപിച്ച് വംശവര്‍ദ്ധന.വംശനാശത്തെ പ്രതിരോധിക്കണം അപകടം തിരിച്ചറിയാനുള്ള കഴിവ്.മണത്തറിയാനുള്ള കഴിവ്,സംഘശക്തി മൂത്രമൊഴിച്ച് ആശയവിനിമയം.മനുഷ്യനില്ലാത്ത പലകഴിവുകളും പട്ടികള്‍ക്കുണ്ട്.പട്ടി പ്രേമികളും പട്ടിവിരോധികളും രണ്ട് തട്ടില്‍.കോടതി , പഞ്ചായത്ത് വന്ധ്യംകരണം പ്രൊജക്ട്.കൊല്ലാന്‍കു ത്തിവയ്ക്കുന്ന മരുന്ന് ലാഭിക്കാന്‍,തലയില്‍ പട്ടിക കൊണ്ട് അടിച്ച് കൊലപാതകം.
അങ്ങനെ പട്ടികള്‍ ഗതികെട്ട് മനുഷ്യവിരോധികളായി.ഇന്ന് പട്ടികള്‍ അരോഗദൃഢഗാത്രരാണ്.മുഖത്ത് ദൈന്യതയില്ല ആരെയും കൂസലില്ല.കുഴലിലിട്ടാല്‍ നിവരാത്ത വാല് പ്രഷ്ടത്തിനടിയിലല്ല.അത് അഭിമാനപൂര്‍വ്വം ഉയര്‍ത്തിപിടിച്ചിരിക്കുന്നു.കൂട്ടമായി നടക്കുന്നു.ഇന്ന് മനുഷ്യര്‍ അവരുടെ ദയയിലാണ്.ഇടവഴിയില്‍ നടന്നു പോകുമ്പോള്‍ രണ്ട് പട്ടികള്‍ എതിരെ വന്നാല്‍കടിയേല്‍ക്കാതെ രക്ഷപ്പെട്ടാല്‍ ഭാഗ്യം. ഒരു നോട്ടം കൊണ്ടോ വടിപ്രയോഗം കൊണ്ടോ അവന്‍ പിന്മാറില്ല കടികിട്ടിയാല്‍ പണികിട്ടി.മനുഷ്യരുടെ പടയൊരുക്കം അവനറിഞ്ഞിട്ടുണ്ടാകും.പോയി പണിനോക്കട്ടിഷ്ടാ എന്ന ഭാവമാണ്.ഇന്ന് അവന്‍ കുരച്ചാല്‍ കടിയുറപ്പാ.അവറ്റകള്‍ക്ക് എന്തോ പറ്റിയിട്ടുണ്ട് അസുഖമെന്തെങ്കിലും ? അല്ലെങ്കില്‍ ഇത്രയും കൂസലില്ലായ്മ !!! ഒന്നുമല്ല.നന്ദികേടിനൊരതിരുണ്ട്.ചരിത്രം സാക്ഷിയാണ്.അളമുട്ടിയാല്‍.....അതെ സംഘടിക്കും പ്രതികരിക്കും പുച്ഛിക്കും ആക്രമിക്കും നിലനില്‍പിന്‍റെ പ്രശ്നമാണ്.എല്ലാ പ്രാണികള്‍ക്കും അതിനുള്ള അവകാശമുണ്ട്.പരിണാമസിദ്ധാന്തപ്രകാരം ഇത്തരം എത്രയോ യുദ്ധങ്ങള്‍ക്കും പോരാട്ടങ്ങള്‍ക്കും ശേഷമാണ് ഭൂമിയിലെ ജീവജാലങ്ങള്‍ ഈ അവസ്ഥയിലെത്തിയത്.എന്നാലും മനുഷ്യരാശിയ്ക്ക് നിലനിലനില്‍ക്കണം.കോടതി ഉത്തരവ് സമ്പാദിക്കണം.നിയന്ത്രിക്കണം.എങ്കിലും ഒന്നോര്‍ക്കണം സഹജീവികളോടെന്നപോലെ സഹപ്രാണികളോടും അല്‍പം ദയവും കാരുണ്യവുമൊക്കെ ആവാം.അല്ലെ .....ഏയ്.....എവടെ

ഏകാന്തം..........


ചിതലരിക്കുന്ന ഭിത്തികൾ
ഞരങ്ങുന്ന പലകകൾ
പൊടിവിതറുന്ന മച്ച്
ചിലന്തികൾ മാറാല കെട്ടിയ ജനാല
പഴമയുടെ മണം പേറുന്ന പഴന്തുണികൾ
മാതൃസ്നേഹം തുളുമ്പുന്ന ഹൃദയം
അസ്വസ്ത്ഥ ചിത്തം
ചുളിഞ്ഞു പഴകിയ ദേഹം
കൃശഗാത്രം താങ്ങാനാവാതെ കാലുകൾ
ഒന്നുനിവർത്തുവാൻ കൊതിക്കുന്ന നട്ടെല്ല്
താങ്ങില്ലാത്തൊരമ്മയ്ക്ക് താങ്ങായിനിൽക്കുന്ന കൈവടി
ഒരു നൂറുനാവായി ചെറുമക്കൾതന്നുടെ ചെറുതായ വികൃതികൾ
ഓർത്തുചിലയ്കുന്ന നാവ്
ഉറ്റവർതന്നുടെ കാൽപെരുമാറ്റത്തിനായ്
കാതോർക്കുന്ന കാതുകൾ
ഇടുങ്ങിയ വഴികളിൽ മുക്കിയും
മൂളിയും ചലിക്കുന്ന ശ്വാസം
നഷ്ട വസന്തത്തിൻപ്രിയനായകൻറെ വശംകെടുത്തുന്ന ഓർമ്മകൾ
ചെറുവിരലനക്കത്തിലുംഭയപ്പാടിൻറെ ഉടുക്ക് കൊട്ടുന്ന നെഞ്ചകം
അനായേസേന മരണ
മതി ശീഘ്രം എന്ന പ്രാർത്ഥന
എല്ലാമറിയുന്ന ദൈവം
ഇവയുടെയൊക്കെ ആകെത്തുകയായ
ആർദ്രമായ രണ്ട്കണ്ണുകള്‍.

ഗാന്ധി

സബർമതിതീരം പുളകിതമായി
രഘുപതിരാഘവ മന്ത്രധ്വനിയിൽ
അതിശയമുജ്വലം ധീരമുദാത്തം
അനുപമ ജീവിത സാര സന്ദേശം
അഹിംസാ ധർമ്മം ഉജ്വലതേജം
സ്വാവലംബിത ദേശം ലക്ഷ്യം
ഹരിജനോദ്ധാരം സമരസഭാവം
സത്യാഗ്രഹം സമരസിദ്ധാന്തം
പരതന്ത്ര ബന്ധിത കുടില തന്ത്രം
സ്വാതന്ത്രത്തിൻ പഥ സഞ്ചലനം
ഐക്യമത്യ ബല സഹിത മുദാരം
നവയുഗഭാരത ജയ ജയഭേരി
ബഹു വിധഭാഷാസംസ്കൃ തി കേന്ദ്രം
അഗണിതജനമയ കേളീഗേഹം
പിതൃപദമർപ്പിതം തവപദപത്മം
ഭാരത ഭൂമി പരമം ധന്യം

അവകാശിയും അധികാരിയും

നവംബര്‍ 14 ന് ശിശുദിനത്തിന് ബദിയഡുക്കയില്‍ വച്ച് നടന്ന പെയിന്‍റിംഗ് മത്സരത്തിന് ചിത്രകലാദ്ധ്യാപകനായ കുഞ്ഞമ്പു മാഷ് എന്നെയും പൊന്‍മണിയെയുമാണ് (ചിത്രത്തില്‍ അറ്റത്ത് ഇരിയ്ക്കുന്ന പെണ്‍കുട്ടി) അയച്ചത്.ഞങ്ങള്‍ക്ക് ഓരോ ചിത്രങ്ങള്‍ പെയിന്‍റ് ചെയത് കാണിച്ചു തന്നു.അത് അതേപോലെ വരച്ചാല്‍ മതിയെന്നും പറഞ്ഞു.മത്സരം കഴിഞ്ഞ് ഫലം വന്നപ്പോള്‍ പൊന്‍മണിയ്ക്ക് ഒന്നാം സ്ഥാനം.എനിയ്ക്ക് പ്രോത്സാഹന സമ്മാനം പോലും കിട്ടിയില്ല.എനിയ്ക്ക് നല്ല നിരാശ തോന്നി.പൊന്‍മണിയ്ക്ക് മാഷ് വരച്ചു കൊടുത്ത ചിത്രം ഞാന്‍ വരച്ചിരുന്നെങ്കില്‍ എനിയ്ക്ക് സമ്മാനം കിട്ടുമായിരുന്നു എന്ന് ഞാന്‍ വിശ്വസിച്ചു.എന്നാലങ്ങനെയല്ല.അവിടന്നങ്ങോട്ട് പൊന്‍മണിയുടെ ജൈത്രയാത്രയായിരുന്നു.സബ്ജില്ല,ജില്ല,സംസ്ഥാന യുവജനോത്സവങ്ങളില്‍ സമ്മാനം നേടി പൊന്‍മണി മികവ് തെളിയിച്ചു.അതൊരു പ്രതിഭയുടെ ഉദയമായിരുന്നു.ഇന്ന് പൊന്‍മണി മാഹി കലാ കേന്ദ്രത്തിലെ അദ്ധ്യാപികയും പ്രശസ്ഥയായ ചിത്രകാരിയുമാണ്.ഒരു പ്രതിഭയെ കണ്ടെത്തിയതില്‍ കുഞ്ഞമ്പു മാഷിന് അഭിമാനിക്കാം.ഏറെ കാലത്തിനുശേഷം ഞാന്‍ മാഷെ കാണാനിടയാകുകയും ഇക്കാര്യം ഓര്‍മ്മിപ്പിക്കുകയും ചെയ്തപ്പോള്‍ വളരെ വിഷമത്തോടെയാണ് മാഷ് അക്കാര്യം പറഞ്ഞത്.പൊന്‍മണിയെ ഉയര്‍ത്തിക്കൊണ്ടുവന്നതിന്‍റെ ക്രെഡിറ്റ് നാട്ടിലെ പ്രശസ്ഥനായ മറ്റൊരു ചിത്രകാരന്‍ തട്ടിയെടുത്തു.അതെ അതങ്ങനെയാണ് പലകാര്യത്തിലും യഥാര്‍ത്ഥ വ്യക്തിയ്ക്കല്ല അംഗീകാരം ലഭിക്കുന്നത്.പക്ഷെ സത്യം ഞങ്ങള്‍ക്കല്ലെ അറിയൂ......

പുഞ്ചിരി

എതിരേവരുന്നവനപരനെന്നാകിലും
ഒരു ചെറുപുഞ്ചിരി അധികമാവില്ലെടോ
പകരമൊരുപ്രതികരണമവനിലില്ലെങ്കിലും
ഇരുവരിലുമകതളിരിലലിവേറെയുണ്ടാം
ഹൃദയങ്ങൾതമ്മിലുള്ളകലങ്ങളേറുന്നു
അഹമെന്നഭാവംഅകതാരിൽ വിളയുന്നു
അരികിലുള്ളവർതമ്മിലൊരുമയില്ലേതും
അവരവർതന്നുടെ ഇരുൾപൂണ്ടലോകം
മനുജരുടെമനതാരിൽ കുളിർമഴപെയ്യുവാൻ
അവരുടെ യകതാരിൽ ഒരുപുവിരിയുവാൻ
ഒരുനറുപുഞ്ചിരികടമായിനൽകിടാം
ഒരുനല്ലസൗഹൃദകൂട്ടമായ് വാണിടാം

ഇത് നിങ്ങളുടെ പീരിഡല്ല

ഫിസിക്സ് അദ്ധ്യപകനായിരുന്നു ദാമോദരന്‍മാഷ് ക്ലാസ്സ് മാഷും....ദീര്‍ഘകാലമായി കണക്ക് മാഷ് ഇല്ലാതിരുന്നതിനാല്‍ ദാമോദരന്‍ മാഷ് ഞങ്ങളെ കണക്ക് പഠിപ്പിക്കുമായിരുന്നു.ഒരു ദിവസം കണക്ക് പഠിപ്പിക്കുകയായിരുന്ന മാഷോട് ഞങ്ങളിലൊരാള്‍ ദേഷ്യപെട്ട് ഇത് നിങ്ങളുടെ പീര്യേഡല്ല എന്ന് പറഞ്ഞു.ഒട്ടും പ്രതീക്ഷിക്കാതെയാണ് ഞങ്ങളില്‍ നിന്ന് ഇങ്ങനെയൊരു പ്രതികരണമുണ്ടായത്. നിറകണ്ണുകളോടെ മാഷ് ഒന്നും പറയാതെ സ്റ്റാഫ് റൂമിലേയ്ക്ക് പോയി.എന്തുചെയ്യണമെന്നറിയാതെ ഞങ്ങള്‍ പരസ്പരം മുഖത്തോട് മുഖം നോക്കി ഇരുന്നു.അതാ അല്‍പം കഴിയുമ്പോള്‍ മാഷ് തിരികെ വരുന്നു.ക്ലാസ്സും തുടങ്ങി.ഞങ്ങള്‍ക്ക് ആശ്വാസാമായി......ഞങ്ങള്‍ മാപ്പ് അപേക്ഷിക്കാതെതന്നെ കുട്ടികള്‍ അറിവില്ലായ്മ കൊണ്ട് പറഞ്ഞുപോയതാണെന്ന് വിചാരിച്ച് മാഷ് തന്നെ ഞങ്ങള്‍ക്ക് മാപ്പ് തന്നതായിരിക്കും.ഇന്ന് അതോര്‍ക്കുമ്പോള്‍ ഞങ്ങളുടെ കണ്ണ് നിറയുന്നു...........ആ ആത്മാര്‍ത്ഥതയ്ക്കു മുന്നില്‍ ഞങ്ങള്‍ ശിരസ് നമിക്കുന്നു.

ജമീല ടീച്ചറുടെ കുറ്റാന്വേഷണം

ജമീല ടീച്ചര്‍ എന്‍റെ ഹീറോ ആയിരുന്നു.വീട്ടിലെത്തിയാല്‍ വാതോരാതെ ടീച്ചറെ പറ്റി ഞാന്‍ പറഞ്ഞുകൊണ്ടേയിരിക്കും.ടീച്ചറുടെ ഒരു കുറ്റാന്വേഷണ കഥ എനിയ്ക്ക് ഓര്‍മ്മ വരുന്നു.ക്ലാസ്സില്‍ നല്ല വണ്ണമുള്ള ഒരു ചൂരല്‍ വടിയുണ്ടായിരുന്നു.ഗ്രേസി ടീച്ചര്‍ നല്ല വടിപ്രയോഗം നടത്തുമായിരുന്നു.ഈ വടി ക്ലാസ്സിലെ കുസൃതികള്‍ക്കും പഠനത്തില്‍ പിന്നോക്കം നില്‍ക്കുന്നവരുടെയും ഉറക്കം കെടുത്തി.മേശയുടെ അടിവശത്ത് ചൂരല്‍ വളച്ച് കുടുക്കി വയ്ക്കും.ഒരു ദിവസം ആസന്ന ഘട്ടത്തില്‍ ടീച്ചര്‍ ഇരുന്ന ഇരുപ്പില്‍ വടി മേശയ്ക്കടിയില്‍ പരതി നോക്കിയപ്പോള്‍ കൈയ്യില്‍ തടയുന്നില്ല തമ്പാനെക്കൊണ്ട് മേശയുടെ അടിയില്‍ നോക്കിച്ചു.വടി കാണാനില്ല.ടീച്ചര്‍ സ്വന്തം കുനിഞ്ഞു നോക്കി ഉറപ്പു വരുത്തി.അതെ വടി അപ്രത്യക്ഷമായിരിക്കുന്നു.കസേരയില്‍ നിന്ന് എഴുന്നേറ്റ ഗ്രേസി ടീച്ചറുടെ സാരി കസേരയില്‍ ഒട്ടി പിടിച്ചിരിക്കുന്നു.ആരോ കസേരയില്‍ ടാര്‍ ഒട്ടിച്ചു വച്ചിരിക്കുന്നു.ചൂരല്‍ പ്രയോഗത്തിനെതിരെ ആരോ ശക്തമായി പ്രതികരിച്ചിരിക്കുന്നു.രോഷാകുലയായ ടീച്ചര്‍ മൊത്തം ക്ലാസ്സിനോടായി ചോദിച്ചു.ആരാണിത് ചെയ്തത്.ഉത്തരമില്ല.ടീച്ചര്‍ ആകെ വിഷമത്തിലായി പുതിയ സാരി മോശമായതിന്‍റെ വിഷമം വേറെ.വിഷയം ജമീല ടീച്ചറുടെ അടുത്തെത്തി.ക്ലാസ്സ് ജമീല ടീച്ചര്‍ ഏറ്റെടുത്തു.ആരാ ഇത് ചെയ്തത്......മറുപടിയില്ല.ടീച്ചര്‍ അന്വേഷണം തുടര്‍ന്നു.....ഇപ്പ പറഞ്ഞോണം ഇല്ലെങ്കില്‍ എല്ലാര്‍ക്കും കിട്ടും....ഇല്ല... പ്രതികരണമില്ല....എല്ലാവരും കൈകെട്ടി ഇരിക്ക്....എന്നെ തന്നെ നോക്ക്....ജമീല ടീച്ചര്‍ ആജ്ഞാപിച്ചു.ടീച്ചര്‍ കസേരയിലിരിക്കുകയാണ്.കൈരണ്ടും മേശയില്‍ കുത്തി ചൂരല്‍ നെറ്റിയില്‍ അമര്‍ത്തി ഞങ്ങളെ ഓരോരുത്തരെയും തീക്ഷ്ണമായി നോക്കുകയാണ്.എല്ലാവരും കൈകെട്ടി ഇരിക്കുകയാണ്.ചിലരൊക്കെ താനല്ല എന്ന മട്ടില്‍ ചിരിക്കാനും പല ഭാവങ്ങള്‍ മുഖത്ത് കൊണ്ടുവരാനും ശ്രമിക്കുന്നു.നിമിഷങ്ങള്‍ കടന്നു പോകുന്നു....ക്ലാസ്സ് റൂം നിശ്ശബ്ദ്ദം.....പെട്ടെന്ന് ഒരു കോണില്‍ നിന്ന് ഉച്ചത്തിലുള്ള കരച്ചില്‍ കുറ്റവാളിയ്ക്ക് പിടിച്ച് നില്‍ക്കാനായില്ല.എല്ലാ കണ്ണുകളും ആ ഭാഗത്തേയ്ക്ക്..... അതാ മാങ്കു എന്ന മനോഹരന്‍ വലിയവായില്‍ നിലവിളിക്കുന്നു.ടീച്ചര്‍ മനോഹരനെ ചേര്‍ച്ച് പിടിച്ച് ആശ്വസിപ്പിക്കുകയാണ് ചെയ്തത്.എവിടെ വടി...മനോഹരന്‍ കരഞ്ഞു കൊണ്ട് പുറത്തേയ്ക്കോടി.തൊട്ടടുത്ത കുറ്റിക്കാട്ടില്‍ സുരക്ഷിതമായി വച്ചിരുന്ന വടിയുമായി മനോഹരന്‍ തിരിച്ചെത്തി.എല്ലാവരും അടിയുടെ പൊടി പൂരം പ്രതീക്ഷിച്ചിരിക്കുകയാണ്.കുറ്റവാളിയെ പിടിച്ചതറിഞ്ഞ് ഗ്രേസിടീച്ചറും ക്ലാസ്സിലെത്തി.ജമീല ടീച്ചറും ഗ്രേസി ടീച്ചറും എന്തോ സംസാരിക്കുകയായിരുന്നു.സംസാരത്തിനൊടുവില്‍ ജമീല ടീച്ചര്‍ ആ വടി പൊട്ടിച്ച് രണ്ടാക്കി പുറത്തേയ്ക്കെറിഞ്ഞു.പിന്നീടൊരിക്കലും ഗ്രേസിടീച്ചര്‍ ക്ലാസ്സില്‍ ചൂരല്‍ പ്രയോഗം നടത്തിയതായി എനിയ്ക്കറിയില്ല...........ഈ സംഭവത്തോടെ ജമീല ടീച്ചര്‍ എന്‍റെ ഹീറോ ആയി മാറി.അറബി ടീച്ചറായിരുന്നു.ഞങ്ങളെ സയന്‍സ് പഠിപ്പിച്ചിരുന്നു.ടീച്ചര്‍ കഴിഞ്ഞ വര്‍ഷം സേവന നിവൃത്തയായി.ഒരാശംസ അര്‍പ്പിക്കാന്‍ എത്തിച്ചേരണമെന്നുണ്ടായിരുന്നു. കഴിഞ്ഞില്ല.....എല്ലാം ഇന്നലെ കഴിഞ്ഞതു പോലെ.

ബാല(അ)നീതി..............


കളിയേതുമില്ല ചിരിയുമൊട്ടില്ല
കുസൃതികാട്ടുവാൻ വഴിയേതുമില്ല
മുതുകിലെഭാരം ഗുണനിലവാരം
പ്രഥമനായിടാൻബഹുവിധ വേഷം
മുലപാലുമില്ലകിളികൊഞ്ചലില്ല
കൊതിയൂറുന്നോരു ലഹരി മിഠായികൾ
മനോമോഹമാം പൊതിക്കുള്ളിലാക്കി
കൊടുത്തിടുമ്പോഴും നമുക്കില്ല ചേതം
ഉടയവരില്ലാ അനാഥമാം ബാല്യം
പുതിയ പിതാവിൻറെകലുഷിതമനം
അവരുടെ വകകൊടിയപീഡനം
കരയുവാൻപോലുംവഴിയേതുമില്ല
ഭയാതുര മുഖംവ്രണിതമാം ദേഹം
ഒരു തലോടിനു കൊതിക്കുമാപൈതൽ
മനസ്സറിയുവോർസഹിച്ചിരിക്കുമോ
കലാപകാലത്തിൽപലായനംചെയ്യും
പരവശരായ ഹതഭാഗ്യർതൻ
വിറയാർന്ന കൈയ്യിൽകുസൃതികാട്ടിടും
അരുമകളവർവഴുതിവീഴുന്നു
ദുരമൂത്ത ലാഭകൊതിയർ തന്നുടെ
വിഷമഴയുടെഫലസ്വരൂപമായ്
നരകയാതനഅനുഭവിച്ചിടുംബാല്യം
നുറുങ്ങുമസ്ഥികൾ വളർച്ചയില്ലാത്തവർ
തളർച്ച ബാധിച്ചവർ മിതബുദ്ധികളും
മൃതപ്രായരാകും ബഹുവിധമവർ
ദുരിത മിതുകാട്ടി പണം പിടുങ്ങുവോർ
കൊടിയകാപാലികർ അനേകമായിരം
ഭയാനക യുദ്ധംവിതയ്ക്കുന്നു നാശം
പൊടിപുരമായ അവശിഷ്ടങ്ങളും
അവയ്ക്കിടയിലെ ശവശരീരവും
ദിഗന്ദങ്ങൾപൊട്ടുംവിജയഭേരിയിൽ
ഉടയവരില്ലാ ചെറുപൈതൽതൻറെ
കരളലിയിക്കുംകരച്ചിലാർകേൾക്കും
ഒരുകുടുംബത്തിൻ കടുത്ത ദാരിദ്ര്യം
അകറ്റുവാനായി പണിയുന്ന മക്കൾ
പകലന്തിയോളം പണിയെടുക്കുവോർ
വഴിമാറിപോകും അവരുടെ ബാല്യം
വിശന്നുതേങ്ങുന്ന ചൊറികിടാങ്ങളും
ഒരുവറ്റിനായി കൊതിക്കുന്ന ബാല്യം
കടുത്തരോഗവുംവിളർത്തമേനിയും
കണക്കേതുമില്ലദുരിതമീപർവ്വം
ദേവതുല്യരത്രെ ഭാവിവാഗ്ദാനമത്രെ
കളങ്കമൊട്ടില്ല ലവലേശംപോലും
പ്രതികരിക്കാനും തിരിച്ചടിക്കാനും
കഴിവില്ലാത്തവർ അരുമയാം മക്കൾ
ദുരാചാരങ്ങൾക്ക് വിധേയരായവർ
കൊടിയപാതകം അനുഭവിക്കുന്നു
ദിനംപ്രതിയിതുപെരുകുന്നു വേഗം
ശിശുക്ഷേമകാര്യംനിയമത്തിൽ മാത്രം
പിറക്കാത്തഭ്രൂണം കൊടുക്കാത്തവിദ്യ
ലിംഗനീതികൾ ഹനിക്കപ്പെടുന്നു
ഇരുട്ടിലെ കോണിൽപരക്കുന്നഭീതി
അറയ്ക്കുന്ന ചെയ്തി
വിറയ്ക്കുന്ന കാമംപിടയ്ക്കുന്ന ദേഹം
കുനിയുന്ന സ്വത്വംമനുഷ്യരോ നമ്മൾ
മൃഗങ്ങൾക്കുപോലുംതിരിവുണ്ടിതേറെ
വരപ്രസാദംപോൽലഭിച്ചീടും മക്കൾ
അഭിശപ്തരായി വളരുന്നതെന്ത്
വരുത്തേണ്ടതെല്ലാം വരുത്തീടും കാലം
കൊടുക്കില്ല മാപ്പ്നിനയ്ക്കേണം നന്നായ്

ദേവീ സ്തുതി

വീണ പാണിധാരിണീ
സിദ്ധി ബുദ്ധി ദായിനി
സർവ്വ പാപ ഹാരിണീ
ചിന്മയീ മനോഹരീ
ദുഷ്ടജന സംഹാരിണീ
ഖട്ഗ ശുലധാരിണീ
അസുര വർഗ്ഗ മർദ്ദിനീ
ചണ്ഡികേ ഭയങ്കരീ
ക്ഷിപ്രവര പ്രസാദിനീ
സജ്ജന പരിപാലിനീ
ലോക സൗഖ്യ കാരിണീ
സർവ്വ ലോക രഞ്ജിനീ
ആദിശക്തി മോഹിനീ
കദമ്പ മദ്ധ്യ വാസിനീ
ശൈലേന്ദ്ര രാജ നന്ദിനീ
ആദിശക്തി രുപിണീ
ഭക്തജന ഹർഷിണീ
കാരുണ്യ വർഷിണീ
പരബ്രഹ്മ സ്വരുപിണീ
കാത്തുകൊൾക മംഗലേ

ഈ അപ്പ കൊ..റഗ്ഗെ......

ഈ അപ്പ കൊ..റഗ്ഗെ......അന്ത്......കൊറഗ്ഗഗ് പാഡ് ലെ...... നവരാത്രി കാലങ്ങളിൽ മേലാസകലം കരിതേച്ച് തുളു ഭാഷയിൽ കൊച്ചു വർത്തമാനങ്ങളും രസികൻ തമാശകളും പറഞ്ഞ് തന്‍റെ പാള തൊപ്പി നീട്ടി നാണയതുട്ടുകൾ ആവശ്യപ്പെടുന്ന കൊറഗവേഷങ്ങൾ തുളു നാട്ടിൽ കണ്ടുവരുന്നു.പിശുക്കരുടെ കൈയ്യിൽ നിന്നുപോലും പുറകെ കൂടി പത്ത് പൈസയെങ്കിലും വാങ്ങാതെ കൊറഗൻ വിടില്ല.ചെറിയതുകയാണെങ്കിലും കൊറഗൻ നന്ദിയോടെ സ്വീകരിക്കുന്നു.ഇങ്ങനെ കഷ്ടപ്പെട്ട് സമാഹരിക്കുന്ന തുക ദേവീ ക്ഷേത്രത്തിൽ സമർപ്പിക്കുന്നു.ഈശ്വരാനുഗ്രഹത്തതിനും ഇഷ്ടകാര്യ സിദ്ധ്യർത്ഥമായുംചെയ്യുന്ന ''ഹരികെ'' അഥവ പ്രാർത്ഥന യാണ് കൊറഗ വേഷം. കൈയ്യിലെ മുളന്തണ്ട് മനോഹരമായി വായിച്ചു കൊണ്ടാണ് കൊറഗൻ്റെ സഞ്ചാരം.അതോടൊപ്പം ആദിമ സംസ്കൃതിയിലിഴുകിച്ചേർന്ന ചില നാടൻ ശീലുകളും.കാലിൽ ചിലങ്കയും കൈയ്യിൽ വടിയുമായി ഓടിച്ചാടി നടക്കുന്ന കൊറഗ്ഗൻ എന്‍റെ ബാല്യകാല കൗതുകങ്ങളിൽ ഒന്നായിരുന്നു.

Wednesday, September 16, 2015


സത്യമേവ ജയതേ


വിനായകസ്തുതി


ആനന്ദനടനമാടുന്നുഗണപതി
ആമോദമമ്മതൻ തിരുമടിയിൽ
മോദകം കൊണ്ടുണ്ണി അമ്മാനമാടുന്നു
നന്തിയുമൻപോടു കൊമ്പുകുലുക്കുന്നു
 കൈലാസശൃംഗത്തിൽ നൃത്തമാടീടുന്നു.
ധിംധിമി ധിംധിമി ധിംധിമി ധീം
മാനസസരയുവിൽ മുങ്ങിക്കുളിക്കുന്നു
നടരാജനതുകണ്ട് ചുവടുകൾചേർക്കുന്നു
പരിഭവംമാറിതിങ്കളുദിക്കുന്നു
ആദിത്യനൂർജ്ജസ്വലനായിജ്വലിക്കുന്നു
ഇടിനാദം താളമേളമൊരുക്കുന്നു.
മേഘങ്ങളാനന്ദശ്രുപൊഴിക്കുന്നു
പന്നഗം ഫണമതാ നന്നായിളക്കുന്നു
തിരുജഡയിൽ ശാന്തമായ് ഗംഗയൊഴുകുന്നു.
കാനനവാസനും പുലിയേറിയെത്തുന്നു
സോദരനൊടുചേർന്നു നന്നായ് കളിക്കുന്നു.
മയിലതാ ആനന്ദ നൃത്തമാടീടുന്നു.
മുരുകനും അവിടവിടെ ഓടിക്കളിക്കുന്നു
ത്രൈമുർത്തീഭാവമാം വൃക്ഷ ലതാദികൾ
വിരവോടുശിഖരങ്ങളാട്ടികളിക്കുന്നു
കീരിയും പാമ്പും മയിലും പുലിയും
 വൈരംമറന്നൊത്തു ചേർന്നുകളിക്കുന്നു.
ഹിമഗിരിമുത്തച്ഛൻഗിരിജാസുതയുമായ്
പരിചൊടുവാത്സല്യശ്രുപൊഴിക്കുന്നു
ബാലഗജമുഖൻ തന്നുടെ നർത്തനം
അനുപമം അദ്ഭുതം ആനന്ദദായകം
പ്രകൃതിയുമീശനും പക്ഷിമൃഗാദിയും
സമരസമാകുന്ന ദിവ്യ മുഹൂർത്തം
വിഘ്ന വിനാശക മൂഷികവാഹന
പാർവതീനന്ദന പാലയമാം
ദോഷങ്ങളെല്ലാമകറ്റി വൈകീടാതെ
ലോകസുഖം വരൂത്തീടുക നീ

എന്‍റെ ഭൂമി

കീറിപറിഞ്ഞ കുടയുമായമ്മ
ചുറ്റികറങ്ങിനടന്നിടുന്നു
ഏറെയവശയാണെങ്കിലുമായമ്മ
മക്കളെ മാറോടു ചേർത്തിരുന്നു
ഘോരതാപത്തിന്നാഘാതമേറ്റവൾ
എരിപിരികൊണ്ടു തളർന്നു
ഉരുകിയൊലിക്കുന്നു അരുവികളായ്
ചുടുചോരയാ ദേഹത്തിലാകെ
ചുക്കിചുളിഞ്ഞുള്ള ഗാത്രവും
വറ്റിവരണ്ട നേത്രങ്ങളും
വിളറിവെളുത്ത മുഖവും
ജീർണ്ണമാം ഉടയാടകളും
മുടിയിഴയൊക്കവെ വാടിക്കൊഴിഞ്ഞുപോയ്
ഒരുമഹാരോഗിയെപോലെ
കാന്തികലർന്നൊരു മേനീയിൽ വരണ്ട
ശൽകങ്ങൾ തിങ്ങിനിറഞ്ഞു
അനുപമകാന്തിയായ് ശോഭച്ച ശ്രീരൂപം
എവിടെയോ പോയി മറഞ്ഞു
തങ്കകുടങ്ങൾക്കായ് ചുരത്തുന്ന പാലും
കരുതിയനീരും
സമൃദ്ധമാംവിഭവവൈവിദ്ധ്യവും
ഊറ്റിയെടുത്തും തിന്നും കുടിച്ചും മദിച്ചും
വിപണിയിലെത്തിച്ചും
വിഷലിപ്തമാക്കിയും
സുഖലോലചിത്തരാം മക്കളവർ
അമ്മതൻചുടുള്ള നിസ്വനമേറ്റു വലഞ്ഞു അതിനുള്ളപരിഹാരമെന്തെന്നറിയാതെ
ഉഴറിനടന്നവർ വെറുതെ
കാലൊന്നിടറിയാൽ ഒന്നുതികട്ടിയാൽ
പൈതങ്ങൾ ഗതിയറിയുന്നമ്മ
കരുതലോടായമ്മ അടിപതറാതെ
മക്കളെയോർത്തു നടന്നിടുന്നു
വികൃതിയാം പൈതങ്ങൾ
തന്നവിവേക മാണെന്നമ്മയറിയുന്നു നന്നായ്
അതിവേഗമായുള്ള വ്യവസായ വിപ്ളവം
വിഷമായതൊക്കെ ചുരത്തിടുന്നു
വീഷലിപ്തമായോരവശിഷ്ടമെല്ലാം
രക്ഷാ കവചത്തെ കാർന്നങ്ങുതിന്നിടുന്നു
അപ്പോഴുമായമ്മഅരുമയാംമക്കൾതൻ
ഗതിയോർത്ത് ഏറെകരഞ്ഞു
ദാഹജലമിറങ്ങുന്നില്ല കണ്ഠത്തിൽ
അവഗതിമാറിയൊലിച്ചുപായുന്നു
ചുട്ടുപൊള്ളുന്നോരഗ്നിതൻ ഗോളമായ്
തീരുമീയമ്മ വൈകാതെ
മക്കളെ നിങ്ങളുണരുക വൈകാതെ
അമ്മതൻ രോദനം കേൾക്കൂ
ഹരിതാഭമായുള്ളകുടയൊന്നുചൂടി
തണലായിതീരണംനിങ്ങൾ
വർജ്ജിക്കണം നിങ്ങളൊന്നായ്
അമ്മയ്ക്കിണങ്ങാത്തതൊക്കെ
അമ്മയറിഞ്ഞു തരുന്നോരു
കായ്കളും
കനികളും
തണലും
അമൃതിനെക്കാളും രുചിയുള്ളനീരും
പങ്കിട്ടെടുക്കണം
കാത്തു രക്ഷിക്കണം
കരുതിവച്ചീടണം
നാളെയുമമ്മ
ശുഭമംഗലയായി തൻമക്കളെകാത്ത്
പരിലസിക്കുമാറായീടണം
ക്ഷമയുള്ള അലിവുള്ള കനിവുള്ള നമ്മുടെ
സ്നേഹമയിയായൊരമ്മ
മതി മതി
കുസൃതികൾ
വികൃതികൾ
മക്കളെ......
പുതുതലമുറകൾതൻ അതിജീവനത്തിനായ്
നേർ വഴിയേ ചരിക്കുക നമ്മള്‍