അമളി

തെക്കൻ കാറ്റൊന്നു വീശിയ നേരത്ത്
ഞാനെത്തീ മൂവാണ്ടൻ മാവിൻ ചോട്ടിൽ
ചക്കര മാമ്പഴം തിന്നു രസിക്കുവാൻ
ചുറ്റിലും നോക്കിനിന്നാ ആശയോടെ

കല്ലിൻ ചെരിവിലും പുല്ലിൻ മറയിലും
കണ്ടീല ഞാനൊരു മാമ്പഴവും
കരിയില നീക്കീട്ടും കുഴിയിലിറങ്ങീട്ടും
കിട്ടീലെനിക്കൊരു തേൻപഴവും

പെട്ടെന്നു കണ്ടൊരു ചെടിയുടെ ചാരത്ത്
നല്ല മുഴുത്തൊരു മാങ്കനിയെ
ഉള്ളം നിറഞ്ഞു പറഞ്ഞുഞാനെന്നോട്
കയ്യിലൊതുക്കുവൻ ഞാനവനെ

ഉമിനീരുണർന്നെൻറെ നാവിൻ തുമ്പിൽ
കൊതിയോടുഞാനതിനരികിലെത്തി
കറുമുറു തിന്നും ഈമ്പിക്കുടിക്കും
രുചിയോടെ
നുണയും ഞാൻ മതിവരോളം

ഒന്നു കുനിഞ്ഞു ഞാൻ കയ്യിലെടുത്തപ്പോൾ
ഞെട്ടിതരിച്ചു നടുങ്ങിപ്പോയി
വാവലു കണ്ടിച്ച മറുഭാഗമെന്നോടു
വായപൊളിച്ചു ചിരിക്കുന്നു.