ജല ചിന്തകൾ

അത്രകണ്ടാസ്വദിച്ച്
ഒരുനീരുമിറക്കിയിട്ടില്ല
ഞാനന്നാ കുടം ചെരിച്ചെൻ 
കൈകുമ്പിളിൽ കൊണ്ട
അമൃത ജല മാധുര്യം

ചെപ്പു കുടം
കിണറ്റിലെ വെള്ളത്തിൽ മുങ്ങിയലയടിക്കുന്ന 
ആ മുഗ്ദ്ധ നാദം ഇന്നും
തുള്ളിതുളുമ്പുന്നെന്നന്തരംഗം

മഴയ്ക്കു  ശേഷം
അർഘ്യജലം വീഴ്തി,
ജീവനുള്ള  ഇലകൾ
മരിച്ച ഇലകൾക്ക് ചെയ്യുന്ന
ഉദകക്രിയ
എത്ര പാവനമതെത്രപരിശുദ്ധം

ഭൂമിയുടെ
ഉള്ളം നിറഞ്ഞപോൽ 
പള്ളം നിറഞ്ഞ്
ശാന്തമായ് ഉറങ്ങിക്കിടക്കുന്ന
കാഴ്ച എത്ര നയനാനന്ദകരം.

ജീവജലം ചുരത്തുന്ന
സംരംഗങ്ങൾ
അനന്യമായ മാതൃസ്നേഹത്തിൻ
മൂർത്തീമദ്ഭാവമായ് കാണുന്നു.

പുതുമഴയിൽ
ആടിത്തിമർക്കുന്ന പൈതങ്ങൾക്ക്
അതിലേറെയാനന്ദദായകമായ
കളികൾ വേറെയുണ്ടോ